Bekim Hamëz Jashari, duke iu përgjigjur interesimit të madh publik dhe mediatik, ka deklaruar sot se motra e tij, Besarta Jashari, nuk do të jetë pjesë e asnjë liste elektorale për zgjedhjet e ardhshme parlamentare në Kosovë.
Në një deklaratë publike, Jashari theksoi se familja e tyre mbetet e palëkundur në vendimin për të mos u përfshirë në aktivitete të partive politike apo procese zgjedhore. Ai theksoi se ky qëndrim është një dëshmi e angazhimit të tyre për të mbështetur zhvillimin e vendit në mënyrë të paanshme dhe për të promovuar unitetin kombëtar.
“Familja jonë mbetet e angazhuar si përkrahës të paanshëm të zhvillimit të Kosovës, duke ruajtur qëndrimin tonë jashtë përfshirjes aktive në partitë politike,” deklaroi Jashari.
Ai gjithashtu bëri thirrje për bashkëpunim dhe unitet të plotë mes të gjithë akterëve politikë në këtë periudhë vendimtare për Kosovën.
“Vetëm përmes angazhimit të përbashkët mund të fuqizojmë shtetin tonë, të shtrijmë sovranitetin territorial dhe të kontribuojmë për një zhvillim të qëndrueshëm ekonomik, që ofron punësim dhe mirëqenie për të gjithë qytetarët,” theksoi ai.
Deklarata e Jasharit vjen në një moment kritik për Kosovën, ku spekulimet për përfshirjen e figurave të shquara në politikë janë shtuar. Familja Jashari mbetet një simbol i unitetit dhe i sakrificës për lirinë dhe pavarësinë e Kosovës. /Kosovatimes/
