Policia rajonale e Ferizajt në dy raste të ndara ka shqiptuar dy gjoba kundërvajtëse.
Gjoba e parë është shqiptuar pasi policia ka pranuar njoftimin me video nga qytetarët për kthim gjysmërrethi në vend të palejuar.
“Me datën 11.01.2025 rreth orës 19:00 policët e stacionit të Ferizajt kanë identifikuar shoferin A.V (M/K) i moshës 74 vjeç dhe i kanë shqiptuar një gjobë kundërvajtëse prej 100 euro, për shkak se ditë më parë me veturë ka bërë kthim gjysmërrethi tek nënkalimi në rrugën” Ahmet Kaçiku” në Ferizaj. Kjo kundërvajtje është regjistruar (pamje me telefon) nga një qytetar dhe ka qarkulluar në rrjetet sociale”, thuhet në komunikatën për media.
Gjoba e dytë ka të bëjë me rrëshqitje të gomave gjatë lëvizjes dhe kërcënim komunikacioni për ngasësit e tjerë.
“Ndërsa me datën 11.01.2025 rreth orës 21:10 policët e Njësisë së Komunikacionit Rrugor i shqiptuan një gjobë kundërvajtëse prej 150 euro dhe 1 pikë negative shoferit L.M (M/K) i moshës 27 vjeç, për shkakun se në rrugën magjistrale Kaçanik-Shtërpcë, saktësisht në fshatin Firajë ka bërë kundërvajtje në komunikacion, duke bërë rrëshqitjen e gomave gjatë lëvizjes dhe me këtë veprim ka rrezikuar pjesëmarrësit tjerë në komunikacion. Kjo kundërvajtje është regjistruar (pamje me telefon) nga një qytetar dhe është dërguar në adresën e policisë”, vazhdon komunikata. /Kosovatimes/
