Presidenti amerikan, Donald Trump e ka shkarkuar udhëheqësin e shefave të shtabit të përgjithshëm të ushtrisë amerikane, Charles Brown, dhe i ka liruar nga puna pesë admiralë dhe gjeneralë tjerë, duke ndryshuar përbërjen e udhëheqjes së lartë të ushtrisë amerikane.
Gjenerali i forcës ajrore amerikane, Brown, ka shërbyer si udhëheqës i shefave të shtabit të përgjithshëm prej vitit 2023, dhe ishte emëruar nga ish-presidenti Joe Biden.
Brown, zyrtari i dytë me ngjyrë që ka mbajtur një pozitë kaq të lartë, pritej të përfundonte mandatin e tij katërvjeçar në shtator të vitit 2027.
Në një deklaratë të Pentagonit është thënë se Trump do të nominojë gjeneralin e pensionuar Dan “Razin” Caine në pozitën që ka pasur Brown.
Ndaras, Pentagoni ka bërë të ditur se Trump do të zëvendësojë dhe shefen e marinës amerikane, admiralen, Lisa Franchetti – gruan e parë që ka mbajtur një pozitë kaq të lartë ushtarake – si dhe zëvendës-shefin e shtabit të përgjithshëm të forcës ajrore, Jim Slife.
Edhe avokatët e përgjithshëm të forcës ushtarake, të marinës dhe forcës ajrore, janë liruar, gjithashtu, nga puna.
Slife ka udhëhequr Komandën Operacionale të Forcës Speciale Ajrore, para se të bëhej zëvendës-shef i stafit të angazhuar në Lindje të Mesme dhe Afganistan.
Këto vendime janë pjesë e një fushate të çuar përpara nga Sekretari amerikan i Mbrojtjes, Pete Hegseth, për të hequr dorë nga programet për diversitet, barazi dhe gjithpërfshirje në ushtri.
Hegseth ka thënë se Departamenti për Efikasitet Qeveritar (DOGE) do të ketë “qasje të gjerë” për t’i çrrënjosur këto programe nga Pentagoni.
DOGE do të punojë “për t’i gjetur tepricat dhe për t’i identifikuar gjurmët e fundit të prioriteve të Bidenit”, sikurse programi për gjithpërfshirje (DEI).
Këto nuk janë “në thelb të misionit tonë, dhe do t’i flakim tutje”, ka thënë Hegseth.
Shefi i kompanive SpaceX dhe Tesla, Elon Musk – njeriu më i pasur në botë – është angazhuar nga Trumpi për të udhëhequr zyrën e DOGE-s.
Përpjekjet e Muskut për të rritur efikasitetin, kanë rezultuar me largim nga puna të dhjetëra mijëra punëtorëve federalë, duke nxitur nisjen e procedurave ligjore prej palëve tjera.
Pentagoni është duke u përgatitur për shkarkime masive të stafit civil, pas deklarimeve të Hegsethit javën e kaluar lidhur me ndarjet buxhetore.
Trump nuk ka dhënë arsye për zëvendësimin e Brown-it, ndonëse e ka falënderuar për mbi “40 vjet shërbim për shtetin tonë”.
“Ai është një burrë zotëri dhe lider i jashtëzakonshëm, dhe i uroj të ardhshme të mrekullueshme atij dhe familjes së tij”, ka thënë Trump.
Mbështetja e hapur e Brown-it për fushatën Jetët e Njerëzve me Ngjyrë kanë Vlerë, të nxitur pas vrasjes së afrikano-amerikanit, George Floyd më 2020, mund ta kenë bërë shënjestër të administratës që po lufton programet për gjithëpërfshirje në ushtri.
Hegseth ka qenë skeptik për Brown-in para se të merrte detyrën në Pentagon, duke ngritur pikëpyetje në librin e publikuar vitin e kaluar nëse Brown do ta fitonte pozitën nëse nuk do të ishte me ngjyrë.
Demokrati Adam Smith, ka thënë se “masakra e së premtes mbrëma” e Trumpit, ka rritur edhe më shumë kaosin në Pentagon. Ai e ka mbrojtur Brown-in si inteligjent dhe patriot të vërtetë.
Zvogëlimi i stafit civil në Pentagon do të nisë javën tjetër.
Darin Selnick, i angazhuar në pozitën e nënsekretarit të mbrojtjes për çështje të lidhura me personelin, ka thënë përmes një deklarate se të paktën 5 për qind e fuqisë punëtore do të largohet nga puna. Shkurtimet do të fokusohen në punëtorët që janë pranuar së fundmi në stafin që numëron rreth 900.000 punëtorë.
Selnick ka thënë se largimi nga puna i rreth 5.400 punëtorëve, do të përcillet me ngrirje të pozitave të reja të punës, derisa të bëhet një analizë e mëtejme mbi nevojat për personelin.
Një ditë para këtij njoftimi, Hegseth ka thënë përmes një video-mesazhi se “nuk është në interesin publik që të mbahen njerëz, kontributet e të cilëve nuk janë kritike për misionin”. /Radio Evropa e Lirë/
