Organizata e Bashkëpunimit Islamik (OIC) dje mbështeti një kundërpropozim të Ligës Arabe ndaj planit të diskutueshëm të presidentit amerikan Donald Trump për të marrë kontrollin e Gazës dhe për të zhvendosur banorët e saj, thanë dy ministra për AFP. Vendimi i grupit u mor në një takim urgjent në Jeddah, Arabi Saudite, tre ditë pasi Liga Arabe miratoi planin në një samit në Kajro.
Alternativa egjiptiane ndaj planit Trump, e cila është dënuar kryesisht nga komuniteti ndërkombëtar, propozon rindërtimin e Rripit të Gazës nën administrimin e Autoritetit Palestinez. “Takimi urgjent ministror i Organizatës së Bashkëpunimit Islamik miratoi planin egjiptian, i cili tani është bërë plani arabo-islamik,” tha ministri i Jashtëm egjiptian Badr Abdelati, një deklaratë që i bëri jehonë homologut të tij sudanez.
“Është sigurisht një gjë shumë pozitive”, tha Abdelati.
“Hapi tjetër është që plani të bëhet ndërkombëtar”
Kujtojmë se Trump shkaktoi zemërim në mbarë botën me propozimin e tij që SHBA të marrë Gazën dhe ta kthejë atë në rivierën e Lindjes së Mesme, duke zhvendosur me forcë banorët palestinezë në Egjipt ose Jordani. Në një samit në Kajro katër ditë më parë, liderët arabë njoftuan gjithashtu krijimin e një fondacioni për të financuar rindërtimin e Gazës dhe i bënë thirrje komunitetit ndërkombëtar ta mbështesë atë.
“Hapi tjetër është që plani të bëhet një plan ndërkombëtar në mënyrë që të miratohet nga Bashkimi Evropian dhe palët ndërkombëtare si Japonia, Rusia, Kina dhe të tjerët”, tha Abdelati. “Kjo është ajo që ne do të kërkojmë dhe kemi kontakte me të gjitha palët, përfshirë SHBA-në”, shtoi ai. Megjithatë, kundërpropozimi dështon të zbulojë rolin e Hamasit, i cili kontrollon Gazën, dhe u refuzua nga SHBA dhe Izraeli.
Departamenti i Shtetit kundër, Witkoff më pozitiv
“Plani nuk i përmbush pritshmëritë e Uashingtonit,” u tha gazetarëve pardje zëdhënësja e Departamentit të Shtetit Tammy Bruce. I dërguari i presidentit amerikan për Lindjen e Mesme, Steve Witkoff, dha një reagim më pozitiv, duke e cilësuar atë një hap të parë me mirëbesim nga egjiptianët.
Rabha Seif Alam e Qendrës Al-Ahram për Studime Politike dhe Strategjike në Kajro tha se Egjipti po kërkon mbështetje të gjerë për propozimin e tij. “Kjo është një përpjekje për të ndërtuar një koalicion të gjerë që refuzon zhvendosjen e palestinezëve nga Gaza,” shtoi ajo. Plani i Trump ka bashkuar tashmë vendet arabe në opozitë dhe Arabia Saudite gjithashtu priti liderët arabë dy javë më parë për të diskutuar alternativat.
OIC ripranoi gjithashtu Sirinë, e cila u pezullua në vitin 2012 në fillimin e luftës civile nën Bashar al-Asad, pas përmbysjes së atij sundimtari të gjatë në dhjetor. “Ky vendim përfaqëson një hap të rëndësishëm drejt kthimit të Sirisë në komunitetin rajonal dhe ndërkombëtar si një shtet i lirë dhe i drejtë”, tha Ministria e Jashtme siriane në një deklaratë.
