Ministrja në detyrë e Drejtësisë, Albulena Haxhiu ka kritikuar veprimet e opozitës dhe certifikimin e Listës Serbe për zgjedhje, duke theksuar se ky vendim ishte një gabim i përsëritur.
Sipas Haxhiut, kur nuk mësohet nga gabimet, kjo çon në pasojat e papritura të veprimeve të gabuara. Ajo theksoi se Lista Serbe, e cila u krijua në dialogun me Serbinë, vazhdon të jetë një faktor destabilizues në vend.
Haxhiu e konsideron këtë subjekt si një “bombë e kurdisur”, që ka pasur ndikim të madh në çdo qeverisje, përveç asaj të qeverisë Kurti. Ajo theksoi se opozita kishte mundësinë për të parandaluar një tjetër gabim, duke mos lejuar certifikimin e Listës Serbe, sidomos duke pasur parasysh se nënkryetari i saj ishte i përfshirë në organizimin e sulmit në Banjskë dhe nuk ishte distancuar asnjëherë nga ajo ngjarje.
“Lista Serbe ishte dhe mbetet bombë e kurdisur në vendin tonë,” tha Haxhiu, duke shtuar se kjo është një mundësi e humbur për të përmirësuar situatën.
