Deputeti i LDK-së, Anton Çuni pas dështimit të 22-të të konstituimit të Kuvendit të Kosovës ka thënë se zgjidhja e vetme është formimi i një qeverie gjithëpërfshirëse. Ai ka pohuar se partia fituese ka kontaktuar dy deputetë të LDK-së në mënyrë private për zgjidhje drejt formimit të institucioneve.
“Zgjidhja në këto rrethana dhe kushte është mundësia për dakordimin për qeveri gjithpërfshirëse, me kohë të caktuar dhe me agjendë e plan të saktë”, ka thënë Çuni.
“Gjithnjë më sfiduese ka qenë krijimi i qeverisë sesa emërimi i kryetarit të Kuvendit. Kështuqë kur një parti nuk mund t’i ketë votat e mjaftueshme, është e pakuptimtë të vazhdohet me të njëjtën agjendë. Kur nuk janë të zotë të ofrojnë zgjidhje, do të duhej të pranonin zgjidhje”, ka theksuar ai.
Çuni ka thënë se dy nga deputetët e LDK-së janë kontaktuar nga deputetët e LVV-së.
“Është fakt se dy deputetë nga LDK janë në fokus të veçantë të interesimit nga autoritetet e VV-së. Mbetet në diskrecionin e tyre që ata vet të deklarohen. Ne i kemi njohuritë, përmbajtjet e bisedave. Deputetët të cilët më së shumti kontaktohen nga autoritetet e VV-së janë shumë stabil dhe do t’i përmbahen qëndrimeve të LDK-së”, ka thënë Çuni.
“Format e presionit janë të ndryshme, një nga to është edhe kjo duke u ofruar benefite të ndryshme për bizneset e tyre familjare”, ka theksuar ai.
