Derisa sot është mbajtur takimi i parë i Bordit të përbashkët të Mitrovicës së Jugut dhe Mitrovicës së Veriut, në objektin e Ministrisë për Administrimin e Pushtetit Lokal, në Mitrovicë të Veriut, nga ministri në detyrë i kësaj ministrie që është kryesues i këtij bordi, Elbert Krasniqi, RTKlive ka siguruar vendimin mbi të cilin Krasniqi është emëruar një ditë më parë nga kreu në detyrë i qeverisë, Albin Kurti në këtë detyrë.
Në vendimin tre pikësh që mban datën 11 qershor 2025 dhe firmën e kryeministrit në detyrë, Albin Kurti thuhet se ‘Elbert Krasniqi ministër në detyrë i Ministrisë së Administrimit të Pushtetit Lokal caktohet përfaqësues në Bordin e Përbashkët (Bordin e Mitrovicës)”.
Tutje thuhet se ‘Krasniqi si përfaqësues i Bordit të Përbashkët i caktuar nga kryeministri do të ushtrojë funksionin e kryesuesit të Bordit’.
Pika e tretë tregon se vendimi hyn në fuqi nga dita e nënshkrimit.
Në fillim të vendimit thuhet se i njëjti se bazohet në Kushtetutën e Kosovës, Ligjin për Kufijtë Administrativ të Komunave i plotësuar e ndryshuar me Ligjin për plotësimin e ndryshimin e ligjeve që kanë të bëjnë me përfundimin e mbikëqyrjes ndërkombëtare të Pavarësisë së Kosovës, si dhe duke u bazuar në Ligjin për Qeverinë e Republikës së Kosovës.
