Agjencia për Menaxhimin e Emergjencave po vazhdon të bëjë thirrje për kujdes të shtuar në raport me ruajtjen e natyrës, në mënyrë që të evitohet ndezja e zjarreve të cilat mund të kenë përfundime me dëme pas shfaqjes së temperaturave të larta.
Genc Metaj, drejtor i kësaj Agjencie, ka bërë thirrje në “Info Plus” të RTK-së për raportim të rasteve të tilla, në mënyrë që të ketë parandalim për të ardhmen.
“Kërkoj ndihmën e qytetarëve sepse ka gjithmonë një hezitim, sepse njerëzit pavarësisht që i dinë zjarrvënësit nuk i tregojnë. I inkurajoj edhe në mënyrë anonime t’i denoncojnë këto raste”, ka thënë ai.
“Kapacitetet e zjarrfikjes i kemi të mira, mirëpo ndodhin situata kur ka intensifikime dhe rrezikon edhe funksionalitetin e njësisë së zjarrfikësve dhe shpëtimit. Nëse ju kujtohet, vetëm në mars të këtij viti, përgjatë tri ditëve kemi pasur 294 raste, kështu që ka qenë numër jashtëzakonisht i madh, por të gjithë duhet të jemi të kujdesshëm”, ka bërë thirrje Metaj.
Gjatë verës, krizat më të mëdha përjetohen në zona malore si Bjeshkët e Nemuna dhe Malet e Sharrit. Ato fushoret, sipas Metajt, menaxhohen më lehtë.
“Dënimet variojnë nga gjobat, vërejtjet, por mund të shkojnë edhe me burgim”, ka thënë ai në Info Plus të RTK-së.
