Ndryshimet klimatike kanë ndikuar ndjeshëm në rritjen e temperaturave dhe përkeqësimin e kushteve të motit, si në mbarë botën, ashtu edhe në Kosovë. Rritja e temperaturave ka sjellë thatësira më të gjata, valë të të nxehtit dhe ulje të reshjeve, duke rritur ndjeshëm rrezikun e zjarreve në pyje dhe zona rurale.
Ndryshimet klimatike po ndihen gjithnjë e më shumë edhe në Kosovë. Verat e nxehta, reshjet më të rralla dhe zjarret që po shpeshtohen, janë vetëm disa nga pasojat e dukshme të këtyre ndryshimeve.
Kështu thonë njohës të çështjeve mjedisore, të cilët theksojnë se ndikimi i ndryshimeve klimatike tashmë vërehet pothuajse në çdo fushë të jetës.
“Gjithë bota po ka filluar të merret me vonesë, kurse Kosova është mjaftë vonë. Përveç legjislacionit, masat janë jo adekuate. Reshjet kanë deviju dhe nuk janë si më parë. Ka reshje më pak dhe burimet e ujit ka më pak për shkak të thatësisë dhe kemi një deficit ekologjik, në zhdukje të specieve të ndryshme…”, deklaroi Ilir Morina, njohës i çështjeve mjedisore.
Por, përveç ndikimit të klimës, ekspertët e emergjencave theksojnë se rol të madh luan edhe faktori njeri, përfshirë pakujdesinë apo ndezjen e qëllimshme të zjarreve në natyrë.
“Kohët e fundit kemi pasur rritje të temperaturave dhe kjo rritë ndjeshëm rrezikun e zjarreve në zona të ndryshme. Mjafton një veprim i vogël dhe të iniciohet ky zjarret nga disa vendbanime, po rrezikohen edhe vet jeta e banorëve. Në pothuajse 90% të rasteve shkaktar mbetet faktori njeri…”, tha Tahir Ahmeti, njohës i çështjeve të emergjencave.
Sipas të dhënave të fundit nga Qendra Operative e Agjencisë për Menaxhimin e Emergjencave, vetëm brenda pak orësh janë raportuar gjithsej 80 vatra zjarri në gjithë territorin e vendit.
Autoritetet në Kosovë kanë bërë vazhdimisht thirrje për kujdes, duke apeluar tek qytetarët që të mos ndezin zjarre dhe të raportojnë çdo rast të dyshimtë.
