Ish-presidenti i Shteteve të Bashkuara, Donald Trump, tha se po punon për një plan të ri ndihme humanitare për Rripin e Gazës, me fokus në sigurimin e ushqimit dhe nevojave themelore për popullsinë civile, e cila ka vuajtur prej muajsh për shkak të urisë dhe qasjes së kufizuar në ndihmë.
Në një intervistë të shkurtër telefonike me portalin amerikan Axios, Trump tha: “Ne duam t’i ndihmojmë njerëzit. Ne duam t’u lejojmë atyre të jetojnë. Ne duam t’i ushqejmë ata. Kjo është diçka që duhet të kishte ndodhur shumë kohë më parë.”
Edhe pse shprehu shqetësim për raportet në rritje të urisë në Gaza, Trump ia hodhi fajin Hamasit, duke pretenduar se organizata përvetëson ndihmën që hyn në enklavë dhe më pas e rishit atë.
Administrata Trump po punon aktivisht në terren nëpërmjet të dërguarit të posaçëm Steve Witkoff dhe ambasadorit në Izrael Mike Huckabee. Të dy vizituan të premten qendrat e ndihmës të drejtuara nga Fondacioni Humanitar i Gazës (GHF), një organizatë e mbështetur nga SHBA-të dhe Izraeli.
Zëdhënësja e Shtëpisë së Bardhë, Caroline Leavitt, tha se Trump planifikon të miratojë një plan të ri ndihme për Gazën pasi Witkoff ta informojë atë mbi situatën në terren. Megjithatë, Trump i tha Axios se ende nuk kishte marrë një raport nga i dërguari, por e lavdëroi atë duke thënë: “Ai po bën një punë të shkëlqyer”.
Detajet e planit të ri humanitar nuk dihen ende, as nuk është e qartë nëse ndihma do të vazhdojë të ofrohet përmes GHF apo nëse do të përfshijë mekanizma të tjerë të shpërndarjes së ndihmës.
Në deklaratat e mëparshme, Trump theksoi se Shtetet e Bashkuara synojnë të rrisin sasinë e ndihmës për Gazën, por shtoi se pret një përfshirje më të madhe nga vendet e tjera perëndimore, si dhe nga Izraeli.
Izraeli përballet me presion të fortë ndërkombëtar për të kufizuar shpërndarjen e ndihmës humanitare në Gaza, veçanërisht pasi shumica e ndihmës shpërndahet ekskluzivisht përmes GHF, e cila vepron vetëm në pjesët jugore dhe qendrore të enklavës. Një sistem i tillë i detyron shumë palestinezë të ndërmarrin udhëtime të rrezikshme për të siguruar ushqim.
Të enjten, Witkoff u takua me kryeministrin izraelit Benjamin Netanyahu, ku diskutuan ngërçin në bisedimet për armëpushim dhe shkëmbimin e pengjeve. Sipas zyrtarit izraelit, u diskutua edhe mundësia e kalimit nga marrëveshjet graduale për Gazën në një marrëveshje gjithëpërfshirëse.
Trump nuk donte të komentonte mbi këtë mundësi, duke u thënë gazetarëve: “Do ta shihni së shpejti”.
Në rrjetin social X, Witkoff konfirmoi se ai dhe Huckabee kaluan pesë orë në Gaza, ku u takuan me përfaqësues të organizatave humanitare dhe vlerësuan situatën në terren.
“Qëllimi i vizitës ishte t’i jepej presidentit një pamje e qartë e situatës humanitare dhe të ndihmohej në zhvillimin e një plani për të ofruar ndihmë ushqimore dhe mjekësore për popullin e Gazës”, tha Witkoff.
