Profesori, Arsim Bajrami vë në pah se Gjykata Speciale në fund do ta respektojë udhëheqjen nga parimet e drejtësisë e jo nga efektet e saj politike. Sipas tij, ndonëse e krijuar me vullnet të institucioneve të Kosovës, në mungesë provash, kjo gjykatë bashkëpunon me Serbinë.
Gjykimi i ish- krerëve të Ushtrisë Çlirimtare të Kosovës, në Hagë, sipas Arsim Bajramit, doktor i shkencave juridike, synon të rishkruaj historinë e vendit, duke shtrembëruar të vërtetën e luftës së fundit.
“Ky gjykim ka pretendim të rishkruajë historinë e Kosovës që të shtrembërojë të vërtetën e luftës së Kosovës, dhe në një mënyrë duke gjykuar krerët e UÇK-së dhe themeluesit e shtetit,të kriminalizojë edhe vetë shtetësinë, procesin e shtetndërtimit. Ky gjykim dëshiron që të krijojë një lloj ekuilibri dhe balance midis gjenocidit klasik që ka ushtruar Serbia në Kosovë dhe eventualisht ndonjë krimi spontan që mund të jetë gjatë luftës. Ky gjykim do të na prekë të gjithëve dhe atë për shumë gjenerata, sepse inkriminimi eventual i krerëve të UÇK-së do të ndryshojë historinë e Kosovës.
Pavarësisht se Gjykata Speciale është krijuar me vullnet të institucioneve të Kosovës, profesor Bajrami është i bindur se, në mungesë provash, kjo gjykatë, bashkëpunon me Serbinë.
“Kjo gjykatë nuk është treguar korrekte me Republikën e Kosovës e cila është themeluese, sepse me një anë nuk e njeh fare sovranitetin e Republikës së Kosovës, nuk bashkëpunon me asnjë institucion në Kosovë, nuk respekton kushtetutën, ndërsa në anën tjetër publikisht pranon se është në kontakte me Serbinë, prokurorinë speciale nga e cila furnizohet me materiale inkriminuese dhe ndihmon në përgatitjen e të ashtuquajturve dëshmitarë”, deklaroi ai
Me një bindje juristi, profesor Bajrami, vë në pah, se kjo gjykatë, në fund, do të respektojë udhëheqjen nga parimet e drejtësisë e jo nga efektet e saj politike. E nëse ndodh kjo, sipas tij, do të ketë një aktgjykim shfajësues ose lirues.
“Gjykata, nëse udhëhiqet nga parimet e drejtësisë, duhet të bie një aktgjykim lirues apo shfajësues, sepse vetë fiksioni i ndërmarrjes së përbashkët kriminale mbi të cilën është ndërtuar kjo aktakuzë është i paqëndrueshëm, për shkak se lufta e UÇK-së ka qenë një luftë e një guerile patriotike, vullnetare, mbrojtëse, çlirimtare dhe nuk ka pasur kurrfarë qëllimi të bëjë keqtrajtime apo veprime të tjera të palejueshme”.
Ekipi mbrojtës i katërshes së UÇK-së, tashmë ka përzgjedhur dëshmitarët, që kryesisht do të jenë autoritete ndërkombëtare, që kanë punuar ngushtë që nga tetori i vitit 1998. Dëshmitë e tyre, sipas profesor Bajramit, do të kenë një efekt të fuqishëm në procesin gjyqësor.
