Seanca e paraparë për sot në Gjykatën Themelore në Prishtinë, në rastin ndaj ish-ministres së Drejtësisë, Albulena Haxhiu, dhe ish-deputetëve Pal Lekaj, Donika Kadaj-Bujupi e Besa Baftiu, është anuluar me kërkesë të kësaj të fundit. Lajmin e ka konfirmuar zyra e gjykatësit Bujar Ahmeti.
Shtyrjen e seancës për rastin e gazit lotsjellës në Kuvendin e Kosovës e ka konfirmuar edhe avokati i Pal Lekaj, Musa Damati.
Të akuzuarit ngarkohen për posedim të gazit lotsjellës në Kuvendin e Kosovës gjatë zhvillimeve politike të vitit 2016, kur opozita kishte përdorur këtë mjet për të kundërshtuar marrëveshjet e qeverisë së atëhershme.
Gjykata Themelore në Prishtinë më 18 maj 2021, në mungesë të provave, i kishte liruar nga akuzat për armëmbajtje pa leje, Albulena Haxhiu, Pal Lekajn, Donika Kadaj-Bujupin dhe Besa Baftiun, për akuzën e posedimit të gazit lotsjellës në Kuvendin e Kosovës.
Mirëpo, kundër këtij aktvendimi ankesë kishte parashtruar Prokuroria Themelore në Prishtinë, ku në seancën e mbajtur më 6 tetor 2022, kjo Prokurori kishte kërkuar kthimin e rastit në rigjykim.
Më pas, Gjykata e Apelit më 14 tetor 2022, ka marrë vendim me të cilin ka aprovuar ankesën e Prokurorisë Themelore në Prishtinë dhe ka prishur aktgjykimin e Gjykatës Themelore të Prishtinës, duke e kthyer çështjen në rigjykim.
