Policia e Kosovës ka njoftuar se ka vënë në pranga të dyshuarin për kontrabandë me mallra, i cili një ditë më parë nuk i është bindur urdhrit të policisë që të ndalonte veturën.
Policia thotë se i janë vënë në ndjekje të dyshuarit i cili duke ikur me automjetin e tij e ka goditur veturën e policisë e cila është rrokullisur e zyrtarët policor kanë pësuar lëndime.
“Më datën 02.09.2025, rreth orës 19:30, në fshatin Korbliq – Kaçanik, Task Forca e Drejtorisë Rajonale Kufitare Lindje, e përbërë nga Policia e Kosovës dhe Dogana e Kosovës, ka tentuar të ndalojë një automjet të tipit “Mercedes” kombi, i dyshuar për kontrabandë me mallra. I dyshuari nuk iu është bindur urdhrit të policisë dhe gjatë ndjekjes, në të njëjtin fshat, me automjetin e tij ka goditur automjetin zyrtar të policisë, i cili më pas është rrokullisur dhe ka përfunduar jashtë rrugës. Si pasojë, tre zyrtarë policorë kanë pësuar lëndime të lehta trupore. Pas trajtimit në spitalin rajonal të Gjilanit, ata janë liruar”, ka bërë të ditur policia.
Tutje sipas tyre, automjeti i dyshuar është gjetur i braktisur pranë kufirit me Maqedoninë e Veriut, i ngarkuar me mall të kontrabanduar, i cili thonë se është konfiskuar dhe i është dorëzuar Doganës së Kosovës për procedura të mëtejshme ligjore.
“Mallrat e sekuestruara përfshijnë: 270,000 copë (13,500 kuti) cigare “Grand”, 1,600 kg fara kungulli të pjekura, 460 kg fara luledielli të pjekura, 100 kg fara braziliane, 40 kg ananas të tharë, 20 kg banane të thara, 113.4 kg brusnica të thara. Sipas vlerësimeve të tregut, mallrat e sekuestruara kapin shumën prej 23,794 euro deri në 29,877 euro”, thotë policia.
Policia e rajonit të Ferizajt thotë se sot rreth orës 14:00, i dyshuari M.S., 46 vjeç, është arrestuar nga Policia Kufitare e Rajonit Lindje.
“Pas intervistimit nga hetuesit e Sektorit Rajonal të Hetimeve në Ferizaj dhe me vendim të Prokurorit të Shtetit, i dyshuari është dërguar në mbajtje për 48 orë për procedura të mëtejshme hetimore. Prokuroria kompetente ka cilësuar rastin si “Sulm ndaj personave zyrtarë”, ndërsa për kontrabandën me mallra hetimet do të zhvillohen nga Dogana e Kosovës në bashkëpunim me Njësinë e Hetimeve Kufitare”, thuhet në njoftimin e policisë.
