Është promovuar libri “Sali Çekaj – Luftëtar i orëve të para të lirisë së Kosovës”, si përmbledhje artikujsh, shkrimesh e intervistash që dëshmojnë veprimtarinë atdhetare të tij.
Kryetari i Prishtinës, Përparim Rama ka thënë se kjo vepër është dritare për ta njohur Çekajn në shumë dimensione.
“Sali Çekaj nuk ishte veç njëri nga luftëtarët në luftën për liri, por njëri nga nismëtarët e parë të organizimit të armatosur, një jurist, intelektual e patriot që besonte se Kosova duhet të ngrihet me dinjitet mbi shtypjen”, ka thënë Rama.
Kryetari i Shoqatës “Trojet e Arbërit”, Ndue Oroshi ka thënë se ky botim është një përpjekje për të dokumentuar historinë.
“Në dritën dolën kujtimet e rrëfimet e bashkëluftëtarëve, kujtesa familjare, puna e dokumentuar e historianëve të gjitha u bënë bashkë për të për ta nxjerrë në dritën e diellit një pjesë të veprimtarisë kombëtare të Sali Çekajt”, ka thënë Oroshi.
Komandanti i UÇK-së, Sali Çekaj ishte një nga figurat kyçe të rezistencës kundër regjimit serb. Ai u dallua si organizator i stërvitjeve të para ushtarake të shqiptarëve në Shqipëri dhe themelues i strukturave të para të armatosura.
Gjatë luftës, Çekaj drejtoi forcat në Zonën Operative të Dukagjinit dhe mori pjesë në beteja vendimtare, përfshirë atë të Koshares. Më 19 prill 1999 ai ra heroikisht gjatë betejës në Koshare.
