Lidhja Demokratike e Kosovës ka vazhduar fushatën elektorale në qytetin e Ferizajt. Kryetari i LDK-së, Lumir Abdixhiku, theksoi se Ferizaj është një qytet me potencial të madh, prandaj, sipas tij, këtij qyteti i duhet qeverisje e ndershme dhe me vizion të qartë.
“Sot, kur e shohim gjendjen e Ferizajt, kuptojmë se ky qytet nuk është aty ku duhet të ishte. Shumë është premtuar, por pak është bërë për një qytet që është gjenerator i zhvillimit të Kosovës. Ferizaj meriton një qeverisje të ndershme dhe me vizion të qartë, dhe këtë e ofron vetëm Lidhja Demokratike e Kosovës,” theksoi Abdixhiku.
Ai shtoi se ky transformim mund të arrihet vetëm me kandidatin e LDK-së për kryetar të Ferizajt, Visar Azemin.
“Në vend që të përkrahen bizneset dhe të rinjtë, Ferizaj është zbrazur nga energjia e tyre, duke u shndërruar në një qytet të betonizuar. Ferizaj meriton zhvillim dhe kryetarin, Visar Azemi, i cili është shembulli më i mirë i këtij ndryshimi,” shtoi ai.
Ndërkaq, kandidati i LDK-së për kryetar të Ferizajt, Visar Azemi, paraqiti prioritetet e programit të tij për një komunë më të transformuar dhe më të jetueshme për qytetarët.
“Falë jush, Ferizaj është qyteti i dytë me zhvillimin më të madh. Ka ardhur koha që kontributi juaj të shpërblehet dhe t’i kthehet Ferizajt. Ky shpërblim nuk mund të bëhet me qeverisjen e tanishme. Këtë transformim mund ta bëjë vetëm Lidhja Demokratike e Kosovës, duke e kthyer Ferizajn nga një qytet i betonit në një qytet të banueshëm dhe modern,” ka thënë ai.
Azemi shtoi se, qyteti ka nevojë për një qeverisje të re, ku qytetarët të jenë prioriteti kryesor.
“Është momenti për një kryetar, një ekip dhe një qeverisje të re që Ferizajn ta kthejë te qytetari. Në këtë garë nuk kam hyrë për inate, por për të mirën e qytetarëve dhe të qytetit. Kam hyrë për ta shpëtuar Ferizajn dhe për të ndalur degradimin e qytetit tonë,” tha Azemi.
Në këtë tubim, LDK prezantoi gjithashtu edhe listën e kandidatëve për Kuvendin Komunal të Ferizajt, për të cilën udhëheqësit e partisë theksuan se është një listë me profesionistë të fushave të ndryshme, që, sipas tyre, do të garantojnë një përfaqësim më të drejtë dhe një qeverisje më transparente.
