Zhvillimi ekonomik dhe tkurrja e popullsisë në Kosovë ka nxitur përplasje. Deputetja e LDK-së, Hykmete Bajrami, akuzoi Qeverinë Kurti për mashtrim me propagandë, ndërsa ministri në detyrë i Financave, Hekuran Murati, e akuzoi atë për manipulim të të dhënave dhe keqinterpretim të statistikave.
Deputetja e Lidhjes Demokratike të Kosovës, Hykmete Bajrami, ka akuzuar Qeverinë Kurti për mashtrim me propagandë sa i përket zhvillimit ekonomik në vend, duke u thirrur në të dhënat e fundit të Bankës Botërore për tkurrjen e popullsisë në Kosovë.
Sipas saj, Kosova është vendi i parë në botë për nga shkalla e tkurrjes së popullsisë, duke lënë pas edhe vendet që përballen me luftëra.
“Banka Botërore ua rrëzon propagandën: Kosova është vendi i parë në botë për nga shkalla e tkurrjes së popullsisë. Më shumë njerëz ikin nga Kosova sesa nga vatrat e luftës. Prej kujt po ikin qytetarët? Prej lulëzimit ekonomik?”, ka shkruar Bajrami në Facebook.
Këtë deklaratë e ka kundërshtuar menjëherë ministri në detyrë i Financave, Hekuran Murati, i cili e akuzoi deputeten e LDK-së për manipulim me të dhëna dhe keqinterpretim të statistikave.
Sipas Muratit, rënia e numrit të popullsisë nga 1.76 milionë (sipas vlerësimeve të Agjencisë së Statistikave të Kosovës për vitin 2023) në 1.6 milionë (sipas të dhënave zyrtare të regjistrimit të vitit 2024) nuk paraqet emigrim masiv gjatë një viti, por është rezultat i një korrigjimi statistikor që reflekton më saktë të dhënat demografike të dekadës së fundit.
“ASK ka bërë vetëm vlerësime nga viti 2011 deri më 2023, të cilat nuk e kanë pasqyruar me saktësi ikjen e popullsisë në vitet e mëparshme, sidomos gjatë eksodit të madh të viteve 2014–2015, kur LDK-ja e Bajramit ishte në koalicion me PDK-në e Listën Serbe,ashtu siç pak a shumë po përpiqen të bëjnë edhe sot”, ka shkruar Murati.
Sipas tij, deklaratat e Bajramit tregojnë ose manipulim të qëllimshëm, ose mungesë njohurie për statistikat, gjë që ngrit shqetësime edhe për cilësinë e arsimit në të cilin ajo është e angazhuar si ligjëruese.
