Policia Kufitare e Kosovës ka njoftuar se dje rreth orës 18:10 në fshatin Pogragjë të Gjilanit, njësitet policore gjatë patrullimit kanë ndaluar një veturë të cilën e drejtonte një shtetas i Serbisë, ndërsa pasagjer ishte një tjetër shtetas serb.
Gjatë kontrollit në veturë janë gjetur mallra komerciale, përkatësisht një kompresor për traktor, nëntë copë llustera, një frigorifer dhe pajisje hidraulike, të cilat po transportoheshin pa dokumentacionin përkatës, me dyshimin se ishin futur në territorin e Kosovës me qëllim të shmangies nga kontrolli doganor.
Me urdhër të prokurorit, mallrat janë dërguar në terminalin doganor për procedura të mëtejme, ndërsa të dyshuarit, pas intervistimit nga autoritetet, janë liruar në procedurë të rregullt. Rasti është duke u trajtuar nga organet kompetente.
