Për herë të parë në shumë vite, vendet e NATO-s e kanë tejkaluar Rusinë në prodhimin e municioneve, njoftoi të enjten Sekretari i Përgjithshëm i NATO-s, Mark Rutte, në një forum në kryeqytetin rumun, Bukuresht, ku morën pjesë përfaqësues të industrisë ushtarake.
“Deri kohët e fundit, Rusia prodhonte më shumë pajisje sesa të gjitha vendet e NATO-s së bashku. Por kjo nuk është më kështu”, theksoi Rutte . Tani, tha ai, dhjetëra linja të reja prodhimi po hapen dhe ato ekzistuese po zgjerohen brenda Aleancës. “Ne po prodhojmë më shumë sesa kemi prodhuar në dekada”, tha shefi i NATO-s.
Mark Rutte e lidhi nevojën për të zgjeruar prodhimin me “kërcënime reale dhe afatgjata”. Në këtë drejtim, ai përmendi Rusinë, duke vënë në dukje se rreziku që buron nga Moska “nuk do të zhduket me fundin e luftës së paprovokuar kundër Ukrainës”.
Në të ardhmen e parashikueshme, Rusia do të mbetet një forcë destabilizuese në Evropë dhe në botë. Dhe Rusia nuk është e vetme në përpjekjet e saj për të minuar rregullat globale: siç e dini, ajo bashkëpunon me Kinën, Korenë e Veriut, Iranin dhe të tjerë”, deklaroi shefi i NATO-s. Ai tha gjithashtu se këto vende po zgjerojnë bashkëpunimin ushtarako-industrial “në nivele të papara më parë dhe po përgatiten për konfrontim afatgjatë”.
Rutte premtoi se udhëheqja e NATO-s do të vazhdojë të mbështesë inovacionin dhe do të bëjë gjithçka që është e mundur për të përshpejtuar prokurimin nëse sektori i mbrojtjes rrit furnizimet dhe hap linja të reja prodhimi.
- Presidenti rus Vladimir Putin, ushtria e të cilit ka zhvilluar një luftë në shkallë të plotë kundër Ukrainës për katër vjet, përmendi “ritmin në rritje të militarizimit në Evropë” në fjalimin e tij në Forumin Valdai në fillim të tetorit. Putin tha gjithashtu se nëse kërcënohet, përgjigja e Moskës do të jetë e shpejtë dhe “shumë bindëse”.
