Në platformën e Komisionit Qendror të Zgjedhjeve ka nisur publikimi i rezultateve të para për kryetarë komunash nga 18 komunat që ishin në balotazh të dielën e 9 nëntorit. Publikimi i tyre ka nisur pas verifikimit që po bëhet në 18 Qendrat Komunale të Numërimit, në qytetet të cilat një ditë më parë kishin garën përfundimtare për të zgjedhur kreun komunal.
Zëdhënësi i KQZ-së, Valmir Elezi në një deklarim nga Qendra Komunale e Numërimit në Prishtinë, tha se procesi i verifikimit të votave po zhvillohet me transparencë të plotë dhe në prezencë të vëzhguesve.
Ndërkohë,Elezi ka bërë të ditur se pas pak ditësh do të nisë në Qendrën e Numërimit dhe Rezultateve edhe numërimi i fletëvotimeve nga votimi me kusht, i fletëvotimeve nga votimi i personave me nevoja të veçanta si dhe i fletëvotimeve nga votimi jashtë Kosovës.
“Sipas të dhënave preliminare, nga 20 vendvotime me kusht, në 18 komuna të vendit, në përgjithësi janë evidentuar 749 zarfe me fletëvotime. Këto zarfe, ende nuk janë verifikuar. Kjo do të ndodhë brenda disa ditësh pas skanimit të Listës së Votuesve, proces i cili na mundëson që të dimë nëse ndonjë nga votuesit me kusht ka votuar dhe në vendvotimin e tij të rregullt”,tregoi në konferencë Elezi.
Ai tutje sqaroi se sa i takon votimit të personave me nevoja të veçanta, sipas të dhënave që kanë janë më shumë se 1,440 qytetarë të komunave të ndryshme që kanë votuar përmes ekipeve mobile jashtë vendvotimeve nga 2,541 sa ishin të regjistruar.
Ndërkohë, sa i përket votimit jashtë Kosovës përmes postës, Elezi tha se tërheqja e dërgesave postare nga 22 kutitë postare jashtë Kosovës do të bëhet së shpejti.
“Numri i votuesve të regjistruar për votim jashtë Kosovës në këto 18 komuna, ishte: 29,725. Aktualisht nuk e dimë se sa prej këtyre votuesve të regjistruar kanë votuar”, deklaroi ai.
