Një gjest human dhe shembullor është shënuar në Ferizaj, ku një qytetare ka gjetur një shumë parash dhe pa hezitim e ka dorëzuar atë në Polici.
Sipas njoftimit të Drejtorisë Rajonale të Policisë në Ferizaj, më 22 dhjetor 2025, rreth orës 18:00, qytetarja M. Thaqi (45 vjeçe), në parkingun e Qendrës “Village Shopping & Fun” në Ferizaj, ka gjetur në tokë shumën prej 470 eurosh, të cilën menjëherë e ka dorëzuar në stacionin policor.
Fillimisht, nuk dihej se kujt i përkisnin paratë, por po atë ditë, rreth orës 20:30, në polici është paraqitur një qytetare nga Kaçaniku, e cila ka raportuar humbjen e një shume parash. Pas verifikimeve të kryera nga policia, është konstatuar se bëhej fjalë për të njëjtën shumë.
Paratë i janë kthyer pronarit legjitim sot, më 23 dhjetor 2025.
Me këtë rast, Drejtoria Rajonale e Policisë në Ferizaj ka falënderuar qytetaren M. Thaqi për gjestin e saj human dhe përgjegjës, duke vlerësuar bashkëpunimin e saj me policinë dhe duke e cilësuar këtë veprim si shembull pozitiv të përgjegjësisë qytetare.
