Presidenti i Shqipërisë, Bajram Begaj, uroi shqiptarët me rastin e Vitit të Ri 2026, duke theksuar se ky vit duhet të jetë një përpjekje e përbashkët për të kthyer standardin evropian në një realitet të prekshëm në jetën e çdo familjeje.
Në mesazhin e tij, Begaj vuri theksin mbi rëndësinë e familjes dhe vlerave që ajo transmeton, si përkushtimi, puna dhe solidariteti, si baza e një shoqërie të fortë dhe të drejtë. “Kujdesi për brezin e ri nuk është thjesht një ndjenjë, por një zgjedhje e mençur për të ardhmen. Investimi te fëmijët dhe të rinjtë tanë është gur themeli i Shqipërisë evropiane që aspirojmë”, tha ai.
Presidenti theksoi gjithashtu arritjet e shqiptarëve gjatë vitit që po mbyllet dhe sakrificat që qëndrojnë pas tyre. Ai përmendi progresin në forcimin e shtetit të së drejtës, luftën kundër korrupsionit dhe krimit të organizuar, si dhe përpjekjet për të forcuar besimin tek institucionet dhe rolin ndërkombëtar të vendit.
Begaj uroi të gjithë shqiptarët, duke përfshirë ata në Kosovë, Maqedoninë e Veriut, Mal të Zi, Luginën e Preshevës, arbëreshët dhe diasporën, si dhe personelin që shërben larg familjeve gjatë festave, si mjekët, infermierët, forcat e armatosura, zjarrfikësit dhe gazetarët.
Ai përfundoi mesazhin duke nënvizuar rëndësinë e besimit dhe mirëkuptimit mes qytetarëve, solidaritetit dhe përgjegjësisë qytetare: “Shqipëria është shtëpia jonë e përbashkët, përgjegjësia jonë e përditshme dhe e nesërmja që ndërtojmë bashkërisht. Me vendosmëri për të ndërtuar të ardhmen tonë evropiane, ju uroj nga zemra: Gëzuar Vitin e Ri 2026! Zoti e bekoftë Shqipërinë dhe të gjithë shqiptarët!”
