Presidenca e Kosovës thotë se nuk kanë informacione se Agjencia për Parandalimin e Korrupsionit ka nisur verifikimin e pasurisë së presidentes së shtetit, Vjosa Osmani.
Këshilltari për media i presidentes, Bekim Kupina i ka thënë RTKlive se informacione të tilla nuk kanë, porse thotë se presidentja mirëpret çfarëdo verifikimi nga cilido institucion që është i bazuar në pavarësi, paanshmëri, integritet e fakte. Kupina këtë e ka quajtur fushatë njollosjeje, që sipas tij mirëfilli dihen pse po ndodhin në këtë fazë.
“Ne nuk kemi informacione të tilla, por Presidentja Osmani mirëpret çfarëdo verifikimi nga cilido institucion, që është i bazuar në pavarësi, paanshmëri, integritet, ligj dhe fakte të vërteta, por jo në fushata njollosjesh, të cilat dihet mirëfilli pse po ndodhin në këtë fazë”, ka thënë për RTKlive Kupina.
RTKlive për këtë çështje i ka përcjellë pyetje edhe drejtorit të Agjencisë për Parandalimin e Korrupsionit, Yll Buleshkaj, i cili ka thënë se brenda ditës Zyra për Media do të dalë me një përgjigje zyrtare për këtë çështje. Një ditë më parë në media u raportua se Agjencia për Parandalimin e Korrupsionit ka nisur procedurën zyrtare të verifikimit të pasurisë së presidente së Kosovës, Vjosa Osmani, për shkak se siç u raportua në media kjo agjenci ka gjetur dallime të theksuara në deklarimin e saj të pasurisë ndërmjet viteve 2024 dhe 2025.
