Deputetët e Kuvendit të Serbisë do të diskutojnë për zgjedhjen e Qeverisë së re, e cila, sipas njoftimit të mandatarit Millosh Vuçeviq, duhet ta ketë 31 ministrat. Në rendin e ditës është prezantimi dhe zgjedhja e qeverisë, betimi i kryeministrit dhe anëtarëve të qeverisë. Vlerësohet se kjo do të jetë një qeveri me qëndrim të fortë pro-rus.
Kryetarja e Kuvendit të Serbisë, Ana Brnabiq ka deklaruar se ka kushte për punën e Kuvendit, dhe se në seancën ku do të zgjidhet Qeveria e re e Serbisë po marrin pjesë 195 deputetë.
Me këtë ka filluar seanca e posaçme, në rend dite të së cilës është zgjedhja e qeverisë dhe betimi i Kryeministrit dhe anëtarëve të Qeverisë së Serbisë. Mandatari, kryetari i partisë progresive serbe dhe ish-ministri i Mbrojtjes Millosh Vuçeviq do të prezantojë programin dhe do të propozojë përbërjen e qeverisë.
Vuçeviq dje ka njoftuar emrat e 31 anëtarëve të kabinetit të tij, në mesin e të cilëve janë tetë persona të rinj, ndërsa tre persona do të kthehen në qeveri pas një kohe.
Vuçeviq propozoi gjithashtu që qeveria e re të ketë katër nënkryetarë dhe pesë ministra pa portofol. Janë katër figura jopartiake dhe dhjetë gra. Edhe pse mandatari për Qeverinë e re nënvizon se Serbia vazhdon rrugën evropiane, çështja kryesore e qeverisë së re është se ajo përfshin politikanë me një qëndrim të fortë pro-rus.
Në qeverinë e re vijnë dy anëtarë nga lista e zezë te SHBA-se, nën sanksionet amerikane, Aleksandar Vulin, i propozuar për postin e zëvendëskryeministrit dhe Nenad Popoviq, i propozuar për postin e ministrit pa portofol. Të dy kanë lidhje të drejtpërdrejta me Kremlinin, veçanërisht me strukturat e sigurisë ruse.
Departamenti Amerikan i Shtetit ka shprehur zhgënjimin që dy persona të sanksionuar janë nominuar për poste në qeverinë e re. Në lidhje me këtë qëndrim amerikan, presidenti serb Aleksandër Vuçiq tha se “nuk është i lumtur” për njoftimin e Departamentit Amerikan të Shtetit, por ende “shpreson të ketë marrëdhënie të mira me ShBA-ne”.
Ai tha se Qeveria e Serbisë është e zgjedhur nga qytetarët e Serbisë dhe se do të zbatojë interesat e shtetit serb. Përveç kësaj, në qeverinë e re është edhe Milica Gjurgjeviq Stamenkovski, kryetarja e partisë pro ruse të krahut të djathtë Zavetnici, e cila deri dje ishte kritikuese e Vuçiqit nga partitë e djathta, me qëndrime të forta pro-ruse.
Pjesa pro-evropiane e opozitës njofton se do të votojë kundër zgjedhjes së qeverisë së re, duke pasur parasysh se me emërimin e anëtarëve që janë nën sanksionet amerikane dhe kanë lidhje të ngushta me Rusinë, Serbia ka braktisur rrugën evropiane.
“Qeveria e re do të përfaqësojnë interesat e Rusisë dhe të jenë një faktor jostabiliteti në Ballkanin Perëndimor”, njofton Lëvizja e Qytetarëve të Lirë.
“Përbërja e Qeverisë së re tregon se Partia Progresive Serbe dhe Partia Socialiste e Serbisë vazhdojnë të zbatojnë politikat e themeluesve të tyre Millosheviq dhe Sheshel, izolimin e plotë ndërkombëtar të Serbisë, konfliktet në rajon, lidhjet me Rusia dhe futja e ndalimeve për të gjitha liritë civile në vendin tone”, thuhet ne njoftim.
Ata paralajmërojnë gjithashtu se qeveria e re, e cila përfshin njerëz nga lista e zezë amerikane dhe grupet e djathta, është në funksion të zbatimit të projektit “bota serbe”. Fronti i Majtë i Gjelbër (ZLF) njoftoi se qeveria e re do të jetë vazhdimësi e vendimeve të këqija.
Bashkëkryetari i ZLF-së Radomir Llazoviq vlerësoi se është e qartë se qeveria e re e Serbisë do të jetë “qeveri e vazhdimësisë së vendimeve të dëmshme dhe akteve korruptive” dhe, siç tha ai, “gjithçka me të cilën jemi mësuar kur bëhet fjalë për partine progresive serbe”.
Në Qeverinë e re të Serbisë do të jenë tre ministra nga pakicat kombëtare. Tomisllav Zhigmanov si përfaqësues i komunitetit kroat do të jetë ministër për të drejtat e njeriut, pakicave dhe dialogun shoqëror, ndërsa Husein Memiq nga komuniteti boshnjak do të jetë ministër i turizmit dhe rinisë dhe Usame Zukorlliq ministër pa portofol.
Në seancën e sotme janë prezent edhe shefat e misioneve diplomatike konsullore dhe organizatave ndërkombëtare në Serbi, në mesin e tyre edhe ambasadori amerikan Christopher Hill.
