Ushtria izraelite tha të martën se ka marrë kontrollin e pikëkalimit kufitar në Rafah, midis Gazës dhe Egjiptit, pjesë kjo e cila ka qenë thelbësore për dërgimin e ndihmave dhe daljen e njerëzve të lënduar nga lufta në Gazë.
Ushtria tha se forcat po skanonin zonën në mëngjes pasi nisën një operacion tokësor dhe ajror në një pjesë të Rafahut lindor të hënën mbrëma, mes përpjekjeve diplomatike jashtë vendit për të arritur një armëpushim të ri.
Autoriteti i Kalimeve të Gazës tha në një deklaratë se marrja e kontrollit nga Izraeli ishte një “dënim me vdekje” kundër banorëve të Gazës, veçanërisht të sëmurëve dhe të plagosurve.
Gjatë gjithë luftës shtatë-mujore, Rafah – i vetmi vendkalim që nuk drejtohet nga Izraeli, ka qenë linja kryesore e shpëtimit për 2.3 milionë palestinezët e Gazës, duke lejuar furnizimet humanitare nga dhe transportin e pacientëve jashtë gjatë mungesave të rënda dhe shkatërrimit të objekteve të kujdesit shëndetësor.
Ushtria izraelite tha se një operacion i kufizuar në Rafah kishte për qëllim të vriste luftëtarët dhe të çmontonte infrastrukturën e përdorur nga Hamasi, grupi militant palestinez i shpallur organizatë terroriste nga Shtetet e Bashkuara dhe Bashkimi Evropian.
Aleati më i afërt i Izraelit, ShBA-ja, ka këshilluar kundër një sulmi në Rafah, qyteti që është streha e fundit për rreth gjysmën e popullsisë së Gazës.
Zyrtarët palestinezë shëndetësorë thanë se tanket dhe avionët izraelitë goditën disa zona në Rafah gjatë natës, duke vrarë 20 palestinezë dhe duke plagosur disa të tjerë në goditjet në të paktën katër shtëpi.
Banorët thanë se Izraeli kishte lëshuar fletushka të reja të martën, duke paralajmëruar përsëri njerëzit të largoheshin nga zonat e Rafahut lindor.
Tanket izraelite bombarduan gjithashtu zonat lindore të Beit Laha, Jabalia dhe Beit Hanun në veri të Rripit të Gazës, thanë banorët.
Ushtria izraelite tha se shumica e njerëzve dhe disa organizata ndërkombëtare kishin evakuuar zonën e Rafahut lindor ku po vepronte. Gjithashtu tha se vrau rreth 20 luftëtarë dhe gjeti tre boshte tuneli.
Një vendkalim tjetër aty pranë, i kontrolluar nga Izraeli, Kerem Shalom, u mbyll të martën për arsye sigurie dhe do të rihapet sapo të lejojë situata e sigurisë, tha ushtria.
Izraeli ka vrarë më shumë se 34.700 palestinezë në sulmet e tij ajrore, tokësore dhe detare në Gazë, sipas Ministrisë së Shëndetësisë në Gazë.
OKB-ja ka thënë se kriza e urisë është duke u zhvilluar në veri të Gazës dhe po shkon drejt jugut.
Lufta filloi kur militantët e Hamasit sulmuan Izraelin më 7 tetor, duke vrarë rreth 1.200 njerëz dhe duke rrëmbyer 252 të tjerë, nga të cilët 133 besohet se mbeten në Gazë, sipas të dhënave izraelite.
