Mirlinda Tishukaj-Sadiku, deputete e Kuvendit të Kosovës nga Lëvizja Vetëvendosje e ftuar në “Info Plus” të RTK-së ka folur për agjendën legjislative të Kuvendit si dhe ka komentuar zhvillimet politike në vend.
Kur kanë mbetur edhe pak ditë kur Kuvendi i Kosovës do të hyjë në pushim, Tishukaj- Sadiku tha se ndonëse agjenda ishte e ngarkuar Kuvendi i Kosovës ka arritur ta përmbushë një pjesë të agjendës së tij.
“Ndonëse agjenda legjislative ka qenë shumë e ngarkuar, ka raste kur e kemi përmbushur atë, por po ashtu kemi raste kur kemi dështuar ta përmbushim. Megjithatë, nuk është që ka munguar vullneti politikë, mirëpo gjatë këtyre tre viteve në kuvend është shpenzuar një energji shumë e madhe edhe në debatet të cilat janë iniciuar në Kuvend”, tha Tishukaj- Sadiku.
Tutje ajo ka thënë se kjo legjislaturë ka pasur debate dhe komisione hetimore së tepërmi, krahasuar me legjislaturat paraprake.
“Është konsumar energji shumë e madhe me debatet e shumta që janë iniciuar nga opozita, e po ashtu edhe shumë komisione hetimore. Nuk e di që ka pasur në legjislatura tjera aq komisione hetimore sa ka pasur kjo legjislaturë dhe kjo ka konsumuar një sasi të energjisë së deputetëve”, tha ajo.
Ajo ka folur edhe për draftin e Asociacionit të komunave me shumicë serbe dhe për deklaratat e kryeministrit që ai t’i dërgohet Komisionit të Venecias, teksa ka theksuar se një draft i tillë duhet t’i kalojë të gjitha filtrat.
“Mendoj se siç është propozuar drafti nuk është keq që të dërgohet në të gjithë filtrat sepse nuk po flasim për diçka që është kalimtare, për diçka që është njëvjeçare, por për të ardhmen e Kosovës”, tha ajo.
