Temperaturat e larta të këtyre ditëve shtojnë rrezikun nga helmimi si pasojë e konsumimit të ushqimeve të shpejta ose me afat të afërt të skadimit. Mjekët kërkojnë më shumë kujdes në ushqimin që konsumohet.
Stina e verës dhe ngritja e temperaturave shtojnë rrezikun nga helmimi si pasojë e konsumimit të ushqimeve të shpejta dhe atyre të konservuara.
Andaj, disa qytetarë deklarojnë se është e rëndësishme që ushqimin ta marrin gjithmonë nga shtëpia.
“Gjatë verës kemi kujdes të shtuar për ushqim tu e dit se janë temperaturat e larta prandaj mundohemi të kujdesemi andaj unë marrë ushqim nga shtëpia dhe e ha në zyre”, ka thënë për RTK, qytetari Nazmi Sahitaj
Kurse Selman Rugova, ka theksuar se kur i shikon qytetarët duke konsumu mish befasohet.
“Sidomos bashkatdhetarët këtu afër edhe hajn qebapë. Në këtë kohë është rreziku ma i madh. Qebapët, suxhuku, mishi janë helm për trupin e njeriut”, ka thënë ai.
Kujdes të shtuar në konsumimin e ushqimeve, kërkojnë edhe mjekët, sikurse Valdet Hashani.
“Këshilla përpos asaj që duhet të kujdesen për veti nga dielli, rëndësi të veçantë ka edhe ruajtja e ushqimit të cilin e konsumojnë andaj shmanguni ushqimeve të ziera gjatë verës“, ka rekomanduar Hashani.
Megjithatë, rreziku për helmim vjen edhe nga ushqimet në shtëpi, në rastet kur ato blihen me afat të afërt të skadimit. Për këtë arsye, Agjencia e Ushqimit dhe Veterinarisë ka shtuar inspektimet.
“Kemi pak inspektorë, por po mbështetemi nga inspektoratet tjera vetëm e vetëm që produktet ushqimore gjatë gjithë kohës të mbahen nën kontroll që ato të jenë të shëndetshme për qytetarët”, ka thënë Lamir Thaqi, zyrtar për Informim në AUV.
Ndërkaq, Instituti Kombëtar i Shëndetësisë Publike rekomandon që gjatë ditëve të nxehta të konsumohet më shumë ujë, si dhe pemë e perime.