Qytetarët e Kaçanikut kanë adresuar kritika ndaj qeverisë lokale pasi tash e tre muaj thonë se janë pa ujë të pijes.
Nga komuna thonë se po e presin mbështetjen e qeverisë duke larguar përgjegjësinë nga vetja. Megjithatë, si qytetarët rezidentë dhe mërgimtarët, thonë se jeta është shumë e vështirë në Kaçanik pa ujë.
I shqetësuar me situatën e ujit, është edhe mërgimtari nga Kaçaniku, Bujar Bela. Ai thotë se pushimet në vendlindje i vështirësohen ngase shumicën e kohës mbeten pa ujë.
Besim Ilazi, kryetar i Kaçanikut, thotë se është i njoftuar me problemin dhe se banorët nuk e meritojnë këtë.
“Është e vërtetë që shqetësimet e qytetarëve janë të arsyeshme dhe pikërisht adresë kanë Kryetarin e Komunës. Kompetencat e menaxhimit të ujit janë bartur në nivel qendror me një vendim të kryeministrit atëherë Komuna e Kaçanikut dhe unë si Kryetar kemi qenë në nivel të mangët në veprime çfarë mund ti marrim”, ka thënë Ilazi.
Kaçanikasit do të vazhdojnë të përballen me mungesë të ujit të pijes deri në një zgjidhje nga institucionet lokale dhe ato qendrore.
