Mesazhe të mëdha të bashkëpunimit u dhanë në mbledhjen e përbashkët të dy Kuvendeve, të Kosovës e Shqipërisë të dielën në Tiranë.
Kryetari i Parlamentit të Kosovës, Glauk Konjufca, deklaroi se 28 nëntori është dita më e rëndësishme e kombit shqiptar, që ‘mban brenda ëndrrën për liri’.
Teksa përmendi rrezikun që Kosovës si shtet po i vjen nga Serbia, siç tha ai në rrugë diplomatike dhe me financimin e grupeve kriminale, Konjufca theksoi se mbështetja e Shqipërisë është thelbësore për të mbrojtur interesat e kombit.
Kryetarja e Kuvendit, Lindita Nikolla, dha mesazhin për të zhdukur kufijtë mes dy vendeve.
“Sa më e bashkuar bashkësia shqiptare në rajon aq më i qëndrueshëm do jetë rajoni. Shqipëria dhe Kosova si entitet në Ballkan duhet t’i shndërrojmë kufijtë mes dy vendeve në formalë. Për këtë një rol kanë kuvendet tona”, tha Nikolla.
Kryeministri i Kosovës, Albin Kurti kërkoi më shumë bashkëpunim mes Kosovës dhe Shqipërisë, jo vetëm në raste festash.
“Vendet tona kanë probleme, nga të cilat më i mprehti është largimi i të rinjve. Shqipëria bëhet, Kosovë bëhet. Puna është rruga jonë, nderi e besa janë cilësitë tona dhe ne do i tregojmë botës se siç po nxjerrim këngëtarë e afaristë të suksesshëm do jemi në gjendje të bëjmë shtetin dhe demokracinë”, tha Kurti.
Kryeministri Edi Rama, deklaroi se sot, 110 vjet pas shpalljes së Pavarësisë së Shqipërisë, shqiptarët kanë më shumë të drejta se kurrë me parë.
Rama u shpreh besimplotë se njohja e Kosovës do të vijë shumë më shpejt se ç’u desh për të shpallur pavarësinë si shtet.
Me rastin e 110-vjetorit të Pavarësisë Shqipërisë, në Kuvendin e Republikës së Shqipërisë në Tiranë, u mbajt mbledhja e përbashkët e Kuvendit të Republikës së Kosovës dhe Kuvendit të Republikës së Shqipërisë.
