Policia e Kosovës në raportin 24 orësh ka dhënë detaje lidhur me mbylljen e komunës paralele të Skënderajt e cila sipas policisë funksiononte në një objekt pronësi e Trepçës.
Siç bëhet e ditur, gjatë kontrollit aty janë gjetur dhe konfiskuar dokumente e pajisje që vërtetojnë se nga aty janë lëshuar dokumente të falsifikuara.
“Lidhur me rastin më datë 16.10.2024, njësit policorë pas informacioneve të marra nga rrugët operative, kanë zhvilluar kontrolle në objektin nën pronësi të Trepçës, pasi që në atë lokacion ishte duke funksionuar komuna paralele e Skënderajt. Gjatë kontrollit janë gjetur dhe konfiskuar dokumente dhe pajisje të cilat vërtetojnë se në këtë objekt ilegal janë lëshuar dokumente ilegale të falsifikuara. Rasti vazhdon të hetohet”, thuhet në njoftimin policor.
Ndërkohë, dje gjatë ditës, Veton Elshani zëvendëskomandant i Policisë së Kosovës për Rajonin e Veriut i tha RTKlive se gjatë verifikimeve policore në terren kishin ardhur deri tek informacioni se Komuna Paralele e Skënderajt është aktive në territorin e Mitrovicës Veriore.
Elshani ka thënë se nga aty kanë marrë disa dëshmi e pastaj zyra është mbyllur. Tha se të arrestuar nuk ka, por ka treguar se intervistimi i përgjegjësit të kësaj zyre do të bëhet sot.
