Lidhja e Bizneseve të Kosovës ka shprehur shqetësimin për ndërprerjet e shpeshta të energjisë elektrike që po dëmtojnë rëndë aktivitetin ekonomik në vend. Sipas kësaj organizate, shumë biznese kanë raportuar dëme të mëdha si pasojë e ndërprerjeve, duke përfshirë prishje të makinerive, ndërprerje të prodhimit dhe vonesa në realizimin e porosive.
Ndikimi i këtyre problemeve është i rëndë, pasi po çon në humbje klientësh dhe rritje të kostove operative, duke penguar kështu zhvillimin ekonomik. Në një apel të drejtpërdrejtë ndaj Qeverisë së Kosovës dhe institucioneve kompetente, Lidhja kërkon masa të menjëhershme për të garantuar një furnizim të qëndrueshëm dhe pa ndërprerje me energji elektrike.
Sipas Lidhjes, situata aktuale po dëmton imazhin e Kosovës si një destinacion i favorshëm për investime, veçanërisht në prag të festave, kur ndikimi në ekonomi dhe besimi i investitorëve të huaj mund të jetë edhe më i madh. Ajo paralajmëron se nëse problemet vazhdojnë, do të ketë rritje të importit dhe pasoja të tjera negative për ekonominë e vendit.
“Energjia elektrike është element kyç për funksionimin e bizneseve dhe zhvillimin ekonomik. Duhet të krijohen kushte të favorshme për të mbështetur sektorin privat dhe për të ruajtur konkurrueshmërinë e vendit,” thuhet në deklaratën e LBK-së. /Kosovatimes/
