Analistët në Beograd vlerësojnë se zgjedhjet parlamentare kanë qenë një sfidë për partitë serbe, të cilat kanë garuar në kushte ku Lista Serbe ka pasur mbështetje nga Beogradi dhe është tërhequr nga institucionet e Kosovës.
Analistët serb, theksojnë se rezultatet nuk janë vetëm pasojë e mbështetjes së votuesve serbë, por edhe e politikave të Qeverisë së Kosovës dhe ndikimit të Beogradit zyrtar.
“Lista Serbe është fituesja e madhe e këtyre zgjedhjeve, dhe paradoksalisht pikërisht falë veprimeve të Prishtinës në veri, por edhe mbështetjes nga Beogradi. Gjithashtu këto zgjedhje ishin një test i madh për Listën Serbe, e cila pas largimit nga institucionet e Kosovës dhe ngjarjeve në Banjskë, u përball me sfida serioze politike, madje edhe me kërcënime për ndalimin e saj. Megjithatë, ajo mbeti faktor kyç”, tha për RTK-në, Milosh Pavkoviq nga Qendra për Politikat Evropiane.
Kurse, Sofija Popoviq nga European Western Balkans, ka theksuar se Lista Serbe ka më pak vota se më parë, por mbetet kanali kryesor i komunikimit me Beogradin.
“Shumë serbë në Kosovë punojnë në institucionet e Serbisë, ndaj mbështetja e tyre nuk është vetëm politike, por edhe e ndikuar ekonomikisht. Është e rëndësishme që një mandat t’i ketë shkuar Nenad Rashiqi, si dhe që po shfaqen aktorë të rinj politikë veçanërisht në veri”, tha ajo.
Çfarë do të thotë prania e më shumë listave serbe në këto zgjedhje – forcim i pluralizmit apo fragmentim i mëtejshëm i opozitës?
“Nga këndvështrimi i pluralizmit demokratik, pjesëmarrja e gjashtë listave serbe në zgjedhje është një zhvillim pozitiv. Megjithatë, kjo ka çuar në fragmentimin e opozitës, pasi asnjë prej tyre, përveç Rashiqit, nuk arriti të kalojë pragun. Vlen të theksohet se lista e Arsenijeviqit në veri është shfaqur si një faktor lokal autentik”, theksoi Millosh Pavkoviq.
Në Beograd vlerësohet se zhvillimet e mëtejshme do të varet nga rezultatet përfundimtare, të cilat do të përcaktojnë stabilitetin e qeverisë së ardhshme dhe pozitën e komuniteteve pakicë në sistemin politik të vendit.
