Rusia nisi një sulm me dron gjatë natës në portin ukrainas të Mykolaiv në Detin e Zi dhe goditi qytetin minerar të Kryvyi Rih në sulmin më të madh me dron në atë qytet në këtë luftë, thanë zyrtarët ukrainas.
Shtetet e Bashkuara arritën marrëveshje të veçanta me Ukrainën dhe Rusinë të martën për të ndalur sulmet rreth Detit të Zi dhe objektivave energjetike të njëri-tjetrit, por është e paqartë se kur dhe si do të hyjnë në fuqi marrëveshjet. Kryebashkiaku i Mykolaiv tha se ndërprerjet e energjisë në qytet ndodhën herët në mëngjes të së mërkurës, pas një raporti nga guvernatori rajonal se shtatë dronë ishin shkatërruar mbi rajon gjatë natës. Nuk është ende e qartë nëse ndërprerja e energjisë elektrike është një masë paraprake apo rezultat i sulmit të mbrëmshëm në Mykolaiv.
Rusia sulmoi gjithashtu qytetin qendror të Ukrainës, Kryvyi Rih, duke shkaktuar zjarr dhe duke dëmtuar ndërtesa, por sulmi ishte pa viktima, tha kreu i administratës ushtarake të qytetit. “Natyrisht që pushtuesit ‘dëshirojnë paqe’ kështu”, shkroi në Telegram Oleksandr Vilkul, kreu i administratës ushtarake, duke e përshkruar atë si sulmin më të madh me dron në një qytet në këtë luftë. “Gjëja më e rëndësishme është se nuk ka pasur të vdekur apo të lënduar.
Reuters nuk ishte në gjendje të verifikonte në mënyrë të pavarur raportet nga Mykolaiv dhe Kryvyi Rih. Shkalla dhe objektivat e sulmit në Krivi Rih janë ende të paqarta. Vilkul kishte raportuar më parë për të paktën 15 shpërthime në të gjithë Kryvyi Rih, vendlindja e Presidentit Volodymyr Zelensky dhe një objektiv i shpeshtë i sulmeve ruse. Nuk ka ende asnjë koment nga Rusia, por Ministria ruse e Mbrojtjes tha se njësitë e saj të mbrojtjes ajrore shkatërruan nëntë dronë ukrainas gjatë natës, duke përfshirë dy mbi ujërat e Detit të Zi.
