Organizuar nga Oda Ekonomike Gjermano-Kosovare, mbështetur nga Sekretariati i Këshillit Kombëtar për Ekonomi dhe Investime (me mbështetjen e SECO e Shtetit Zviceran dhe BERZH-i), kryesues të bizneseve nga sektorë të ndryshëm dhe të institucioneve të vendit u mblodhën për të shqyrtuar mundësitë, implikimet dhe ndryshimet potenciale që sjellë kalimi i Kosovës në tregun e lirë të energjisë.
Përmes një komunikate për medie nga OEGJK bëhet e ditur se sipas vendimit të Zyrës së Rregullatorit për Energji, nga 1 qershori 2025, Kosova do të kalojë në tregun e hapur të energjisë. Ky vendim detyron kompanitë me mbi 50 punëtorë ose qarkullim mbi 10 milionë euro të blejnë energji nga tregu i lirë. Si rrjedhojë, bizneset kanë shprehur shqetësime për rritjen e kostove të prodhimit dhe ndikimin në konkurrueshmërinë e tyre.
Në panel diskutoi ministrja e Ekonomisë, Artane Rizvanolli, e cila tha se tashmë janë në proces të një skeme mbështetëse për bizneset që do të dalin në treg të hapur, e që do të jetë në përkrahjen e tyre për të investuar në efiçiencë dhe burime të ripërtëritshme për të ulur konsumin e energjisë.
Ky diskutim shërbeu si platformë për të analizuar efektet dhe rezultatet e këtij tranzicioni, duke ofruar një kornizë më të qartë dhe të detajuar në lidhje me ndryshimet, shtresat të cilat preken nga këto ndryshime, si dhe përgatitja adekuate e bizneseve me hapa konkret.
“Ngritja e mundshme e çmimeve të energjisë, ndikimi në konsumatorë dhe mundësitë për negocimin e kontratave me furnizuesit e licencuar (përveç KESCO) – me theks të veçantë në bizneset prodhuese dhe sektorin e shërbimeve – qenë vetëm disa nga sfidat e shqyrtuara. Rrjedhimisht, u theksua edhe nevoja për mbështetje nga institucionet qendrore dhe lokale për bizneset e prekura nga ky ndryshim”, thuhet në komunikatë.
Si zgjidhje dhe hapa të domosdoshëm për qëndrueshmëri ekonomike, u konsideruan investimi në burime alternative dhe negocimi i kontratave afatgjata me furnizues për të siguruar stabilitetin e çmimeve si dhe uljen e varësisë nga tregu.
