Shpërthim i madh në Iran. Të paktën 115 të plagosur

Një Zjarr dhe një shpërthim i fuqishëm goditi një port në jug të Iranit mëngjesin e sotëm, duke plagosur të paktën 115 persona, njoftoi televizioni shtetëror. Shpërthimi ndodhi në portin Rajaei, jo shumë larg Bandar Abbas, terminali kryesor i kontejnerëve të Republikës Islamike.

Videot në mediat sociale treguan tym të zi të dendur që ngrihej pas shpërthimit. Autoritetet ende nuk e kanë bërë të ditur shkakun e shpërthimit.

Mehrdad Hasanzadeh, një zyrtar i menaxhimit të krizave në provincë, i tha televizionit shtetëror iranian se kishte të lënduar, pa dhënë detaje të mëtejshme. Ai shtoi se ekipet e shpëtimit po përpiqen të arrijnë në zonën e prekur, ndërsa në të njëjtën kohë po kryhet evakuimi.

Hasanzadeh deklaroi se shpërthimi erdhi nga një kontejner në portin Rajaei. Porti i Rajaeit trajton kryesisht trafikun e kontejnerëve, por gjithashtu përmban rezervuarë nafte dhe fabrika të tjera petrokimike.