Deputeti i Lidhjes Demokratike të Kosovës, Lutfi Haziri, ka deklaruar se vendi po përballet me një krizë të thellë politike, ndërsa mungesa e vullnetit për të gjetur një zgjidhje të shpejtë ka bërë që situata të përsëritet vazhdimisht.
“Në një ditë po, në një ditë jo, situata po përsëritet e njëjtë. Mungesa e një vullneti politik për të gjetur një zgjidhje të shpejtë tashmë është bërë e pavlefshme edhe për t’u përmendur. Jemi vonë. Kjo ka filluar të bëhet shqetësuese për qytetarët, por edhe për vetë ne si deputetë,” tha Haziri.
Sipas tij, megjithatë ekzistojnë rrugë dhe mundësi që duhet të shfrytëzohen deri në fund për të gjetur një zgjidhje.
“Nuk është çështje emrash të përveçëm, as për mua, as për LDK-në. Është çështje parimesh. Është e domosdoshme që procesi i konstituimit të institucioneve të finalizohet sa më parë, përmes një marrëveshjeje politike që shkon përtej urgjencës aktuale. Kosova përfundimisht është në një krizë politike, e cila në mungesë të funksionimit të Kuvendit, e më vonë edhe të ekzekutivit me legjitimitetin e dalë nga zgjedhjet e 9 shkurtit, e pengon vendin të ecë përpara,” shtoi ai.
Haziri kritikoi gjithashtu qeverisjen aktuale, duke theksuar se kujdestaria në qeveri nuk është funksionale dhe nuk ka bazë legjitime.
“Nuk është e drejtë dhe as legjitime që një person të jetë njëkohësisht edhe deputet edhe ministër. Roli ynë si LDK ka qenë dhe mbetet konstruktiv. Me sjelljen tonë politike po kontribuojmë në ruajtjen e qetësisë, por për fat të keq kjo po mirëmbahen nga zoti Kurti dhe nuk po punohet realisht për zhbllokimin e situatës,” përfundoi ai.
