Korporata Energjetike e Kosovës ka dalë me dy njoftime të rëndësishme për konsumatorët që nga 1 qershori kanë kaluar në tregun e hapur të energjisë elektrike.
Në njërin njoftim, KEK ka sqaruar detajisht obligimet ligjore që rrjedhin nga vendimi i Zyrës së Rregullatorit për Energji (ZRRE) për Furnizuesin e Mundësisë së Fundit (FMF).
Sipas këtij vendimi, konsumatorët që nuk kanë zgjedhur ende furnizues në tregun e lirë kalojnë automatikisht te FMF – në këtë rast, KEK, për një periudhë të përkohshme dhe me çmime jo të favorshme.
Ndërsa sot, KEK ka bërë një ftesë të qartë dhe të drejtpërdrejtë për të gjithë konsumatorët, veçanërisht bizneset dhe ndërmarrjet publike, që të lidhin kontrata komerciale me KEK për furnizim me energji elektrike me kushte shumë më të favorshme.
Në këtë ftesë, KEK ka theksuar se furnizimi nga FMF është zgjidhje emergjente dhe afatshkurtër (60 ditë), me çmime më të larta se tregu.
Pas kësaj periudhe, sipas KEK-ut, lidhja e kontratës me një furnizues në treg të hapur është e detyrueshme.
Në njoftim thuhet se kontratat komerciale me KEK ofrojnë furnizim të qëndrueshëm, çmime konkurruese dhe transparencë të plotë, me referencë nga bursa zyrtare e energjisë – ALPEX.
KEK-u thekson kjo ftesë është më shumë se një mundësi, është zgjedhja më e mençur për të gjithë konsumatorët që duan siguri, transparencë dhe leverdi financiare në furnizimin me energji.
Ftesa e KEK për lidhje kontratash komerciale është publike dhe e hapur për të gjithë.
