Kryeministri në detyrë i Republikës së Kosovës, Albin Kurti,ka pritur në takim Presidentin e Parlamentit të landit të Saxony-Anhalt në Gjermani, Gunnar Schellenberger.
Kreu në detyrë i qeverisë thuhet ta ketë njoftuar mysafirin me zhvillimin ekonomik dhe klimën e investimeve gjatë mandatit qeveritar, ku thonë se Kosova ka regjistruar normat më të larta të rritjes ekonomike në Ballkanin Perëndimor.
“Theksoi incentivat për investitorët vendas dhe të huaj, gjersa vendi ynë po kthehet në një destinacion më tërheqës investimi veçanërisht në fushën e teknologjisë”, thuhet në njoftimin e qeverisë.
Gjithashtu kanë treguar se dyshja kanë biseduar edhe mbi politikat qeveritare për ndërlidhjen e arsimit me tregun e punës sipas modelit gjerman, i cili tashmë po zhvillohet në vend në kuadër të strategjisë kombëtare për modernizimin e arsimit profesional, me fokus në përafrimin e kurrikulave me nevojat e tregut të punës.
“Kryeministri Kurti theksoi dhe transformimin digjital si një shtyllë kryesore e agjendës sonë të reformave, teksa vlerësoi dhe përvojën e eksperiencën që mund të ndajë në këtë drejtim landi i Saxony-Anhalt, me shtrirjen e internetit me brez të gjerë në zonat rurale dhe administratën publike”, thuhet në komunikatë.
Kryeministri në detyrë ka thënë se vizita e Schellenberger do të shërbejë për të thelluar bashkëpunimin, partneritetin dhe lidhjet mes vendeve.
Prezent në këtë takim ishte dhe ambasadori i Kosovës në Gjermani, Faruk Ajeti.
