Sot nis Panairi i Përgjithshëm “Prishtina 2025”, i organizuar nga Oda Ekonomike e Kosovës, një ngjarje e rëndësishme që do të zgjasë deri më 12 qershor. Venera Rexha nga Oda Ekonomike theksoi se këtë vit marrin pjesë rreth 50 kompani, shumica prej tyre vendore, por edhe disa ndërkombëtare, të cilat do të ekspozojnë produktet dhe shërbimet e tyre.
Në një intervistë për “Mirëmëngjesi Kosovë” në RTK, Rexha theksoi rëndësinë e panairit si një platformë e fuqishme për rrjetëzim dhe promovim të produkteve kosovare dhe të huaja. Ajo njoftoi gjithashtu për praninë e delegacioneve ndërkombëtare, përfshirë një delegacion nga Shtutgarti, Gjermani, i cili përfshin përfaqësues biznesesh dhe të Odës Ekonomike të Shtutgartit. Delegacioni do të marrë pjesë edhe në një konferencë që zhvillohet paralelisht me panairin.
Pjesëmarrje do të ketë edhe nga Çekia, përmes një delegacioni të përbërë nga biznese dhe përfaqësues të Odës së tyre ekonomike.
Rexha shtoi se panairi i këtij viti është i përgjithshëm dhe përfshin kompani nga sektorë të ndryshëm, si: ndërtimtaria, përpunimi i drurit, ushqimi, industria e metaleve, energjia dhe sektorë të tjerë.
Një tjetër aspekt i rëndësishëm është përfshirja e Shoqatës së Grave brenda Odës Ekonomike të Kosovës, e cila çdo vit u ofron grave mundësinë për të marrë pjesë dhe për të promovuar shërbimet apo produktet e tyre në panair.
