Kryetari i PDK-së, Memli Krasniqi pas dështimit të 41-të të konstituimit të Kuvendit të Kosovës, ka thënë se do t’i drejtohen sot Gjykatës Kushtetuese për, siç tha, shkeljet e qëllimshme të Lëvizjes Vetëvendosje në tri seancat e fundit konstituive.
“Sot Partia Demokratike e Kosovës do të dorëzojë te Gjykata Kushtetuese një rast të ri, për të cilën shpresojmë se do ta trajtojë me urgjencën e nevojshme meqenëse i kemi vetëm edhe 23 ditë deri në përmbylljen e afatit për konstituimin e Kuvendit”, ka thënë ai.
Ai akuzoi LVV-në e ka uzurpuar dhe i ka marrë peng institucionet e vendit.
“Tri vazhdimet e fundit të seancës konstituive kanë qenë shkelje e qëllimshme dhe me vetëdije nga ana e kryesuesit të seancës, me instruksione të partisë së tij. S’mund të qëndrojmë duarkryq”, ka thënë Krasniqi.
Për herë të 41-të ka dështuar përpjekja për konstituimin e legjislaturës së nëntë të Kuvendit të Republikës së Kosovës. Në votimin për Komisionin për votim të fshehtë nga deputetët 99 sa ishin në sallë, 54 votuan për, kundër dhe abstenim nuk pati.
Aktgjykimi i Gjykatës Kushtetuese ka obliguar Kuvendin e ri që të konstituohet brenda 30 ditëve nga mbledhja e tij e parë. Megjithatë, që nga publikimi i këtij vendimi më 26 qershor, partitë nuk kanë arritur marrëveshje për zgjidhjen e situatës.
Kryetari i PDK-së në prononcimin para mediave ka komentuar edhe deklaratën e kryeministrit në detyrë, Albin Kurti, i cili dje në një intervistë ka thënë se zyrtarët e PDK-së vizitojnë ish-ushtarët e UÇK-së që janë në paraburgim në Hagë, për instruksione politike.
“Është e dhimbshme që ai po vazhdon me këtë deklaratë të jetë argat i Prokurorisë sepse deklaratat e tilla janë të cilat e dëmtojnë drejtpërdrejtë pozicionin e tyre”, ka thënë ai.
“Kompleksi i Kurtit në raport me UÇK është diçka që e ka definuar gjatë gjithë jetës së tij. Përndryshe si mund ta arsyetoni që kurrë s’ka shkuar t’i vizitojë në Hagë, as Rexhep Selimin madje. Si mund ta arsyetoni ndryshe që Kurti bashkë me Albulena Haxhiun ia ka zvogëluar edhe fondet e mbrojtjes”, ka shtuar Krasniqi.
