Kandidati i Alternatives për kryetar të Prishtinës, Merkur Beqiri, ka marrë pjesë së bashku me një grup aktivistësh dhe banorë të lagjes Qëndresa dhe të rajonit të Veternikut në një aksion simbolik për të shënuar hapësirën që nuk duhet të jetë mal i mbeturinave, por vend i jetës.
“Aty, ku dikush hedh hekur e beton, ne hodhëm farë jete: fidanë e fara lulesh”, tha Beqiri.
Ai njoftoi se pjesë e aksionit ishte pastrimi i një pjese të vogël të terrenit ku ishte krijuar një deponi ilegale me mbeturina inerte dhe mobilje të vjetra, dhe mbjellja e një fidani.
Beqiri theksoi se aksioni kishte një mesazh të trefishtë.
“Thirrje urgjente Ndalese për hedhjen e mbeturinave në hapësira të lagjeve tona”, “Zotim se qeverisja jonë e ardhshme do të merr masa urgjente për largimin e deponive ilegale dhe parandalimin e rasteve të tjera të ngjashme”, dhe “Shembull për qytetarët e Prishtinës nga subjekti jonë dhe nga Merkur Beqiri – rruga për një kryeqytet të pastër e të shëndetshëm fillon nga gjesti i vogël – nga një fidan i mbjellë në vend të një bërllogu”, tha ai.
Beqiri theksoi se “rruga në shëndritje nuk arrihet duke bërë gjëra të mëdha e vërdallë, por duke bërë gjëra të vogla me zemër të madhe.”
