Një kompani izraelite sigurie thotë se është kontaktuar nga hajdutët që fshihen pas vjedhjes së bizhuterive në Luvër, duke i ofruar negociata sekrete për të shitur sendet e vjedhura nëpërmjet rrjetit të errët.
Grupi CGI pretendon se menaxhmenti i Luvrit e injoroi ofertën, edhe pasi hajdutët dhanë prova të qarta se ata ishin në posedim të disa prej bizhuterive të vjedhura. Ai thekson se hajdutët kërkuan dhjetëra milionë euro për sendet e vjedhura.
“Egoja dhe hezitimi duket se kanë luajtur një rol”
Tzvika Naveh, CEO i kompanisë, tha se kompania mori një mesazh të koduar përmes faqes së saj të internetit pesë ditë pas grabitjes së 19 tetorit nga një person që pretendonte se përfaqësonte hajdutët. “Ai na ofroi negociata në rrjetin e errët për të blerë sende të vjedhura, duke e kufizuar kontaktin në vetëm 24 orë”, vuri në dukje Naveh.
“Kompania u angazhua në një seri bisedash të koduara me një përfaqësues të hajdutëve dhe mori indikacione se ai me të vërtetë zotëronte të paktën disa nga sendet e vjedhura. Ata ishin në arrati dhe duhej të shpëtonin shpejt nga plaçka e tyre”, shtoi ai.
Ai kontaktoi Luvrin nëpërmjet një ndërmjetësi dhe është i pakënaqur me faktin që muzeu nuk iu përgjigj ofertës për gjashtë ditë. “Ne humbëm besueshmërinë tek hajdutët dhe Luvri humbi një mundësi të vërtetë për të kthyer bizhuteritë. Fatkeqësisht, egoja dhe hezitimi duket se kanë luajtur një rol”, tha Naveh.
Ai pohon se disa muaj më parë, në një intervistë me gazetën italiane Il Tempo, paralajmëroi për diskutime në darknet që sugjeronin plane për të grabitur Luvrin.
Vlera e plaçkës vlerësohet në 88 milionë euro.
Disa raportime sugjeruan se Grupi CGI ishte i përfshirë në hetimin e grabitjes, por Luvri ka mohuar çdo kontakt të drejtpërdrejtë me kompaninë izraelite. Kompania pretendon se komunikimi është kryer përmes degës së saj italiane dhe ndoshta është kontraktuar nga një kompani sigurimi e lidhur me muzeun.
Kujtojmë se hajdutët hynë me forcë në një nga dhomat më luksoze të muzeut dhe ikën me xhevahire të kurorës me vlerë rreth 88 milionë euro.
Disa persona janë arrestuar deri më tani, por thesaret e vjedhura, përfshirë gjerdanin me smerald dhe diamant që Napoleoni I ia dha gruas së tij të dytë, Marie Louise, dhe diademën me 212 perla dhe pothuajse 2,000 diamante që i përkisnin Perandoreshës Eugenie, nuk janë gjetur ende.
