Tre pjesëtarë të KFOR-it amerikan janë lënduar si pasojë e një vetaksidenti që ka ndodhur sot rreth orës 14:30, në fshatin Sllatinë, në rrugën Mitrovicë–Leposaviq.
Lajmin e ka konfirmuar për RTKlive zyrtari i trafikut rajonal në Mitrovicë të Veriut, Munish Avdiu.
Ai tha se automjeti i KFOR-it është rrokullisur pasi drejtuesi nuk e ka përshtatur shpejtësinë me kushtet e rrugës.
“Një automjet i KFOR-it nuk e ka përshtatur shpejtësinë me kushtet e rrugës dhe është rrokullisur. Tre persona kanë pësuar lëndime dhe janë dërguar për tretman mjekësor. Lëndimet nuk janë të natyrës serioze. Ka qenë vetaksident”, tha Avdiu.
Sipas tij, Policia e Kosovës dhe njësitë ushtarake të KFOR-it kanë përfunduar vendshikimin dhe po hetojnë rrethanat e aksidentit.
