Presidentja e shtetit, Vjosa Osmani ka dekoruar me Medaljen Presidenciale të Meritave, Hasan Arat për kontribut të jashtëzakonshëm në mbështetjen e sportit ndërkombëtar në veçanti për mbështetjen ndaj Kosovës.
Gjatë ceremonisë së ndarjes së medaljes, Osmani tha se Arat ka ndihmuar me kontributin e tij vendimtar në procesin e kandidaturës së Kosovës për organizimin e Lojërave Mesdhetare “Prishtina 2030”.
“Në bazë të kompetencave të mija kushtetuese si presidente e Republikës së Kosovës kam vendosur që Hasan Arat ta dekorojë me Medaljen Presidenciale të Meritave, një nga dekoratat më të larta të Republikës së Kosovës, për personalitetet me kontribut të shquar”, tha ajo.
Osmani tha se Medalja Presidenciale i ndahet atij me motivacion: Për kontributin e jashtëzakonshëm në zhvillimin dhe promovimin ndërkombëtar të sportit kosovar, për mbështetje të vazhdueshme dhe konkrete ndaj Republikës së Kosovës dhe institucioneve të saj sportive, veçanërisht në procesin e kandidaturës për organizimin e Lojërave Mesdhetare “Prishtina 2030”.
Presidetja tha se kjo medalje ndaj Arat është si shenjë nderimi e mirënjohjeje nga populli i Kosovës dhe institucionet e saj për mbështetjen e palëkundur, që tha se Arat dha për sportin kosovar dhe aspiratat ndërkombëtare.
