istoria e radios publike në Bullgari fillon që në vjeshtën e vitit 1929, kur një grup entuziastësh krijuan një transmetues radiofonik në Punishten Ushtarake të Inxhinierisë në Sofje. Në fillim të vitit 1930, intelektualë dhe personalitete publike themeluan në kryeqytetin bullgar një shoqatë të radioamatorëve me emrin “Radio Amtare”, e cila që nga viti 1934 quhet Radio Sofja. Po atë vit filloi transmetimet edhe Radio Varna. Më 25 janar 1935, Mbreti Boris III nënshkroi një dekret me të cilin transmetimi radiofonik në Bullgari u bë pronë shtetërore. Që nga fundi i vitit 1935 datojnë edhe përpjekjet e para për transmetime jashtë vendit, por transmetimi i parë i suksesshëm u realizua në vitin 1936. Revista “Radio Sofja e re” thekson: “Të dielën e kaluar, më 16 shkurt, e gjithë programi i mëngjesit i Radio Sofjes, përfshirë edhe liturgjinë hyjnore nga Kisha “Shën Sofia”, u transmetua me valë të shkurtra dhe u dëgjua në të gjithë Evropën”.
Nga 1 maji 1937 filluan transmetimet e rregullta edhe në gjuhë të huaja: frëngjisht, gjermanisht, anglisht, italisht dhe esperanto, ndërsa nga fillimi i vitit 1938 edhe në gjuhën turke. Autorët dhe prezantuesit e edicioneve të para në gjuhë të huaja ishin bashkëpunëtorë të jashtëm, ndër të cilët edhe i famshmi Petër Uvaliev, i cili përgatiste programet në gjuhën italiane, si dhe regjisori operistik, i bërë i njohur më vonë, Mihaill Haxhimishev, i cili prezantonte përmbajtjen në gjuhën angleze. Që nga viti 1992, programet e BNR-së për jashtë vendit transmetohen nën emrin Radio Bullgaria.
Në vitin 2004 u krijua edhe faqja e parë e internetit e Radio Bullgarisë, me informacion dhe audio në 11 gjuhë: bullgarisht,shqip, anglisht, rusisht, gjermanisht, frëngjisht, spanjisht, greqisht, turqisht, serbisht, dhe arabisht. Sot, faqja e Radio Bullgarisë vazhdon të ofrojë një larmi informacioni për vendin tonë në gjuhë të huaja, por në vend të një faqeje në gjuhën arabe, tani kemi një faqe në gjuhën rumune.
Sot, radioja publike e Bullgarisë disponon dy programe kombëtare 24-orëshe: programin informativo-muzikor “Horizont” – lider i padiskutueshëm në fushën e informacionit, i cili renditet në vendin e parë në pothuajse të gjitha sondazhet e audiencës së dëgjuesve, dhe “Hristo Botev” – krijues i një përmbajtjeje unike kulturore dhe arsimore. Nëntë stacionet rajonale radiofonike luajnë një rol të rëndësishëm në jetën shoqërore dhe kulturore të bashkive bullgare.
Programet javore në eter “Ora e Radio Bullgarisë” korrën një sukses të jashtëzakonshëm dhe janë ndër më të preferuarit nga dëgjuesit e programit kombëtar për kulturë “Hristo Botev”, ndërsa emisionet e përditshme në gjuhën turke janë favoriti i padiskutueshëm i audiencës së BNR-së në Kërxhali.
Që nga viti 2001, Radioja Kombëtare dorëzon çmimet vjetore “Sirak Skitnik” për kontribut të rëndësishëm në zhvillimin e medias publike. Ceremonia zyrtare këtë vit do të mbahet më 26 janar në Studion e Parë të BNR-së, ndërsa Radio Bullgaria ka nominime të veçanta.
Ekipi i programit në gjuhën turke i Radios Bullgaria
Ndër kandidatët për Çmimin e Madh është edhe ekipi i programit në gjuhën turke të Radios Bullgaria. Ndër shumë të merituarit për çmimin e gazetarisë radiofonike, u nominua edhe Joan Kolev nga redaksia bullgare e Radio Bullgarisë.
Joan Kolev
Ndër nëntë të nominuarit në kategorinë për emision radiofonik, projekt radiofonik, projekt muzikor ose projekt multimedial, është edhe podkasti “Ura e Besimit” i Radio Bullgarisë, me prezantuese Darina Grigorova dhe Aleksandra Karamihaleva, i cili prej një viti sjell historinë e komuniteteve ortodokse bullgare në mbarë botën.
Gjatë ceremonisë do të ndahen gjithashtu çmimi “Zëri i Artë”, i cili jepet nga fondacioni “Nadezhda Xheneva”, si dhe çmimi “Profesionalizëm në eter”, me të cilin BNR nderon një emision ose gazetar nga një media tjetër radio-televizive./RB
