Rusia ka bombarduar Ukrainën jugore derisa katër rajonet, që pjesërisht kontrollohen nga Moska, kanë hyrë në ditën e tretë të të ashtuquajturave referendume për bashkim me Federatën Ruse.
Ushtria e Ukrainës tha mëngjesin e 25 shtatorit se gjatë 24 orëve të fundit dhjetëra sulme me raketa dhe sulme ajrore ishin nisur kundër objektivave ushtarake dhe civile në jug të Ukrainës, duke përfshirë 35 vendbanime.
Rajonet në Luhansk, Donjeck, Herson dhe Zaporizhja – të gjitha në juglindje të Ukrainës – ku po mbahen referendumet e rreme ruse, kanë nisur më 23 shtator dhe do të vazhdojnë deri më 27 shtator.
Ky veprim konsiderohet i paligjshëm sipas Ligjit ndërkombëtar dhe i njëjti është dënuar nga Ukraina, Perëndimi dhe Organizata e Kombeve të Bashkuara.
Në rajonet ku po mbahen të ashtuquajturat referendume për bashkim me Rusinë nuk ka vëzhgues të pavarur.
Zyrtarët ukrainas kanë thënë se njerëzve atje u ishte ndaluar të largoheshin deri në përfundimin e votimit më 27 shtator, dhe se grupet e armatosura po u shkonin në shtëpi për t’i detyruar të dalin në votim.
Presidenti rus, Vladimir Putin, urdhëroi më 21 shtator – atë që ai e ka quajtur mobilizim të pjesshëm ushtarak.
Thirrja erdhi pasi forcat ruse pësuan humbje të mëdha territoriale në lindje të Ukrainës, pasi Kievi nisi një kundërofensivë të madhe.
Putin ka urdhëruar pushtimin e Ukrainës më 24 shkurt. Ai e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.
