Edhe ministrja e Jashtme e Shqipërisë, Olta Xhaçka, ka kërkuar që Serbia t’i lirojë sa më shpejt tre zyrtarët policorë të Kosovës.
“Kapja e tre policëve në veri të Kosovës nga ushtria serbe, e ndërlikon akoma më shumë situatën. Kam komunikuar me komandantin e KFOR-it dhe jemi në pritje të përfundimit të hetimeve. Në bisedën që pata me komandantin e KFOR-it, ai ma bëri të qartë, që raporti që prodhohet, ndahet vetëm me NATO-n dhe që si vend anëtar i NATO-s, por jo vetëm, si vend që e ka Kosovën interes kombëtar, gjysmën e kombit të vet, Shqipëria duhet të mbajë një qëndrim konstruktiv, të vetmin qëndrim në fakt, që e shtensionon situatën dhe e mbështet realisht Kosovën”, ka thënë ajo në një fjalim para Parlamentit të Shqipërisë.
Sipas saj, Kosova duhet të tregojë maturi në këtë situatë.
“Jemi të shqetësuar pasi aleatët e partnerët e gjejnë pjesën më të madhe të përgjegjësisë te Kosova. Kjo dobëson në mënyrë shqetësuese pozitat e Kosovës në sytë e SHBA-së dhe BE-së. Deklaratat e Qeverisë së Kosovës për ndalimin e qarkullimit të automjeteve me targa serbe. Ne shpresojmë që kjo të mos ndodhë, pasi vetëm sa do të përshkallëzonte më shumë situatën. Do të dëmtonte mbi të gjitha vetë Kosovën dhe rajonin ekonomikisht, por edhe në sytë e aleatëve”.
Një ditë më parë reagoi edhe kryeministri i Shqipërisë, Edi Rama, i cili iu përgjigj kritikëve në rrjetet sociale për mungesën e një reagimi nga e tij në lidhje me këtë çështje.
“Kush thotë se po heshtim apo kush kërkon t’i hedhim benzinë zjarrit duke ngritur akuza ndërkohë që KFOR-i po investigon rastin, nuk do t’ia dijë as për Kosovën e as për Shqipërinë, po vetëm për luftën e stërhumbur politike me mua apo për politikën e luftës imagjinare me Serbinë”, tha kryeministri i Shqipërisë.
Rama theksoi se Shqipëria është pjesë e bashkësisë euroatlantike dhe mban të njëjtën linjë me ta, për të pritur fjalën e KFOR-it, që po heton rastin dhe nga ana
Kryeministri i Shqipërisë anuloi mbledhjen e përbashkët të qeverive të Shqipërisë dhe Kosovës dhe tha se kishte kërkuar një takim në një format më të ngushtë me homologun kosovar, Albin Kurti.
Ai tha se mbetet në pritje të reagimit të Kurtit për një takim mes tyre, ndërsa paralajmëroi se “një plan i frikshëm sanksionesh është gati për t’u zbatuar ndaj Kosovës”.
Deputetët e opozitës në Shqipëri, e kanë cilësuar të turpshme anulimin e takimit mes dy qeverive, dhe kanë thënë se me këto qëndrime, kryeministri Rama po e dëmton Kosovën.
Që nga tensionimi i situatës në pjesën veriore të Kosovës, në fund të majit, kryeministri i Shqipërisë, Edi Rama, ka mbajtur qëndrim kritik në raport me veprimet e institucioneve kosovare.
Këto zhvillime shihen si pikë e ulët në raportet ndërshtetërore Kosovë-Shqipëri.
