Republika e Kosovës dhe kryeqyteti ynë ka kapërcyer një prag në portat historisë, deklaroi kryetari i komunës Përparim Rama, pasi Prishtina behet mikpritëse e Lojërave Mesdhetare 2030.
Ai në një konferencë për media tha se kjo është një fitore madhështore që tejkalon traditën e deritashme të lojërave mesdhetare, duke shtuar se ripërkufizon edhe vet thelbin e unitetit midis vendeve të Mesdheut.
“Me edicionin e 21-të në vitin 2030 në historikun 70 vjeçar të këtyre lojërave prestigjioze nis një kapitull i ri, për herë të parë një qytet jo bregdetar si Prishtina e jonë behet mikpritëse e tyre”, tha Rama.
Rama shtoi se kjo do të jetë hera e parë në historinë e lojërave mesdhetare kur do ti bashkojnë forcat dy shtete.
“Disiplina e lundrimit thelbësore në lojërat mesdhetare do të luhet në brigjet e Durrësit, ky partneritet strategjik me vëllezërit tanë në Shqipëri e krijon një platformë barazie për të gjitha vendet pjesëmarrëse, e që nëpërmjet ti synojmë ti frymëzojmë të tjerët me menduar përtej kufijve dhe më përqafuar frymën e bashkëpunimit sportive, që me të vërtetë nuk njeh asnjë kufi”, tha Rama.
Tutje Rama tha se rëndësia e kësaj ngjarje shkon përtej këtyre risive, ato do të jenë ngjarja më e madhe që do të zhvillohet Brenda vendit tonë qysh prej pavarësisë e këndej.
“Ky eveniment do të na hap një derë të madhe i gjithë sportit kosovar, duke i mundësuar të gjitha federatave me qenë nikoqire e ngjarjeve në disiplinat e saj përkatëse. Këto lojëra do na përforcojnë pozicionin si të barabartë midis kombeve, duke na ngritur më lartë në skenën botërore”, tha Rama.
