Përfaqësuesi i BE-së për dialogun Kosovë-Serbi, Miroslav Lajçak, si zakonisht edhe kët të diele ka bërë përmbledhjen e aktiviteve të tij kryesore të javës, teksa ka përmendur bisedat që ka pasur me kryenegociatorët, Besnik Bislimi dhe Petar Petkoviq, në kuadër të dialogut Kosovë – Serbi në Bruksel.
Ai i ka quajtur produktive bisedat me dy kryenegociatorët, teksa ka thënë se janë të nevojshme konsultimet në periudhën e ardhshme.
“Me Krishtlindjet afër, javët e fundit të vitit në Bruksel janë veçanërisht të ngarkuara. Të hënën mirëprita në Bruksel kryenegociatorin serb, Petar Petkoviq. Diskutimet tona mbuluan një sërë temash, duke përfshirë draft-statutin për themelimin e Asociacionit të komunave me shumicë serbe në Kosovë, hapat e nevojshëm për zbatimin e Marrëveshjes për Rrugën drejt Normalizimit dhe obligime të tjera të mbetura në pritje. Të mërkurën, u angazhova në një video-konferencë të detajuar me zëvendëskryeministrin e parë të Kosovës, Besnik Bislimi, duke diskutuar një listë gjithëpërfshirëse të çështjeve të dialogut. Ne ramë dakord për hapat e ardhshëm në proces. Ndërsa diskutimet me të dy negociatorët ishin produktive, konsultimet e mëtejshme në periudhën e ardhshme do të jenë të nevojshme”, ka shkruar Lajçak në Facebook.
Ai tutje ka bërë të ditur se përveç diskutimeve dypalëshe, ka marrë pjesë në një konferencë të organizuar nga Instituti Evropian i Paqes, e ku theksoi se ndau njohuri mbi përpjekjet e vazhdueshme për normalizim dhe diskutoi raportin dhe rekomandimet e tyre të fundit.
“I mirëprita përpjekjet e tyre të detajuara kërkimore dhe pres me padurim angazhimet e ardhshme”, ka shtuar Lajçak. /Kosovatimes/
