60 hektarë tokë bujqësore janë kthyer në plantacion të arrave në komunën e Suharekës. Kjo kulturë ka filluar të jetë në fokus të fermerëve vitet e fundit, pasi kërkesat për arroret në treg janë të mëdha.
Vite më parë Fitore Haxha nga Suhareka kishte diplomuar në sociologji. Me gjithë përpjekjet nuk kishte arritur të gjete punë në profesionin e saj. Por, me vetiniciativë nisi një biznes familjar, kultivimin e arrës. Për pak kohë mbolli mbi 7 hektarë arra.
“Kam vendos të ngre këtë plantacion me arra. Punësimi im nisi para një viti, me mbjelljen e arrave. Me ndihmën e familjes besoj që do ja dal , pasi arra është fitimprurëse”, ka thënë ajo për RTK-në.
Terreni ku Fitorja vendosi të investojë ishte i vështirë të kthehej i shfrytëzueshëm.
“Këtu vendi ka qenë krejt mal, ka shkuar një kohë e gjatë, rreth gjysmë viti deri kur e kemi përgatit terrenin. Nga Ministria e Bujqësisë e kemi fituar grantin, kemi rreth 2100 fidanë”, ka thënë Haxha.
Kjo kulturë në komunën e Suharekës po ngjall mjaft interesim.
“Në 2014 në nëntor ne e kemi mbjell një hektarë me arrë, qysh vitin e tretë kemi fillu me marrë prodhim dhe vetëm është shtuar. Institucionet nuk mund t’i kuptoj ku këtë vit e kanë bërë që për të fituar grante duhet t’i kesh tre hektarë. Pse nuk i ndihmojnë fermerët me nga 1 hektarë , por ata me mbi 3 hektarë “, ka shprehur shqetësimin e tij fermeri Sami Muharremaj.
E si këta dy fermerë tokën bujqësore e kanë kthyer në plantacion të arrave edhe dhjetëra të tjerë.
“Ne si drejtori nuk do të rrimë duarkryq, përveç mbështetjes që i jep qeveria prej viti të ardhshëm , është premtim i kryetarit të komunës por edhe imi që do ta subvencionojmë këtë kulturë me 300 euro për hektarë. Dikun në Suharekë janë gjithsej 60 hektarë të mbjellë me arrë”, ka deklaruar Ardian Kotorri, drejtor i bujqësisë në Suharekë.
Arra jep prodhim pas vitit të tretë të mbjelljes, për të arritur në vitin e pestë prodhimin maksimal. Si produkt është mjaft i kërkuar në tregun vendor.
