Ministri i Financave dhe Transfere, Hekuran Murati përmes një postimi në Facebook ka shpjeguar se raporti i Bankës Botërore e thekson që papunësia në Kosovë në fund të vitit 2023 është 10.9%.
“Shifra që disa media po i referohen në atë raport, ka të bëjë me pjesëmarrjen e popullsisë aktive në tregun e punës, pra tregues tjetër prej atij të papunësisë. Kushdo që e ka lexuar së paku një libër për këtë temë, din ta bëjë dallimin në mes të shkallës së papunësisë dhe shkallës së pjesëmarrjes së popullsisë aktive në tregun e punës”, ka shkruar Murati në Facebook, teksa e ka publikuar edhe tabelën e raportit të Bankës Botërore.
Ndërkohë, Lidhja Demokratike e Kosovës e ka vlerësuar alarmues raportin e sotëm të Bankës Botërore.
“Ky raport është ri-konfirmim i asaj që ne si LDK e kemi potencuar vazhdimisht. Kjo Qeveri nuk ka plan për zhvillim ekonomik; por ka vetëm propagandë dhe keqqeverisje. Si rezultat i mungesës së vizionit dhe projekteve zhvillimore të kësaj qeverie, të rinjtë tonë po e braktisin vendin dhe largohen nga Kosova”, thuhet në komunikatën e LDK-së.
Sipas këtij subjekti politik, LDK në krye me Lumir Abdixhikun, e ka një plan të detajuar, si dhe ekipin e duhur për ta zhvilluar ekonominë e vendit dhe për të krijuar vende të reja të punës.
